سکێرتێریا گشتی یا ئەنەکەسێ ئیرۆ د داخویانیەکێ دا راگھاند، “ھەڤدەم لگەل گەفێن ترکیێ یێن ژ بۆ داگیرکرنا ناڤچەیێن نوو، (پەیەدە) ھەما ھەما ھەر رۆژ خوەپێشاندانان دکە و وێنەیێن پەکەکێ بلند دکە و درووشمێن خیانەتیێ ل دژی پارتی و ھێزێن کوردی داڤێژە.”
ئەنەکەسێ د داخویانیا خوە دا بانگ ل جڤاکا ناڤدەولەتی، ب تایبەتی ئامەریکا و رووسیایێ کر کو بریار و رێکەفتنێن ناڤدەولەتی یێن دەربارێ سووریێ دا جێبەجێ بکن. داخواز ژ ڤان ئالیان کر کو کار ژ بۆ نەھیشتنا گەفێن ترکیێ و دەستوەردانا وێ یا لەشکەری د ھەرێمێ دا بکن، ژ بەر کو دێ ئالۆزیێن زێدەتر ژ بۆ کریزا سووریێ چێبکە و ئێش و ئازارێن سووریان و ب تایبەتی خەلکێ ڤێ ھەرێمێ زێدەتر بکە.
ئەنەکەسێ د بەشەکێ دن یێ داخویانیا خوە دا گۆت: “رێڤەبەریا پەیەدێ ب کریارێن خوەیێن ترسناک یێن ل دژی وەلاتیان بەردەوامە و ھەر کەسێ کو ل دژی ئیدیۆلۆژیا وێ بە، چ کەس و چ ھێزێن سیاسی بە کو د سەری دا ئەنەکەسێ، دکە ئارمانج.”
ئەنەکەسە دبێژە: “ئێدی نە ڤەشارتییە کو دەستھلاتداریا دیفاکتۆیا پەیەدێ ب خستنا ھەموو ھێز و کارینان د دەستێ خوە دا، نەکاریە چارەسەریێن پێویست ژ پرسگرێکێن ھەری ھێسانێن ژیانێ ببینە.”
ئەنەکەسێ ئاماژە ب سیاسەت، کریار و بنپێکرنێن رێڤەبەریا خوەسەر کر و دیار کر کو د ڤان شەرت و مەرجێن دژوار یێن ژیانێ دا، یێن وەکی نەبوونا ئاڤ، کارەبا، گرانبوونا نرخێ سۆتەمەنیێ، فەرزکرنا باجا ل سەر وەلاتیان و ھەر وھا بنپێکرنێن وەک رەڤاندنا زارۆکان و لەشکەرکرنا وان د کامپان دا، باندۆرەکا مەزن ل سەر بێ ئارامیا ھەرێمێ کریە.
