ئەنجومەنا نشتیمانی یا کوردی ل سووریێ ئه‌نه‌كه‌سێ، پارتیا یه‌كێتییا ده‌مۆكراتیك په‌یه‌ده ب گه‌فێن تركیێ یێن ده‌ستپێكرنا ئۆپه‌راسیۆنه‌كه له‌شكه‌ری ل سه‌ر رۆژئاڤا به‌رپرسیار دیت و دیار كر كو ئه‌و هنجەتان ب ئۆرگانیزەکرنا خوەپێشاندانێن رۆژانە و بلندكرنا ئالایێن په‌كه‌كێ و وێنه‌یێن عه‌ڤدللا ئۆجالان دده تركیێ.
سەرۆکێ ئەنجوومەنێ سعوود ئەل-مولا تەکەز دکە، ئەو ب مەزناهیا مەترسیێن ل سەر پرسگرێکا کوردی ل رۆژئاڤا كوردستانێ دزانن و هه‌ر وها خه‌ته‌ریا گەفێن ترکیێ و گۆت: «ئه‌مێ تێکۆشینا خوە یا ئاشتیانە بدۆمینن و هەولدانێن دیپلۆماتیک دوجار بکن ژ بۆ دیتنا چارەسەریەکە سیاسی ژ بۆ کریزا سووریێ و پرسگرێکا کوردی».
ژ هێلا خوه‌ڤه ئەندامێ دەستەیا سەرۆکاتیا ئه‌نه‌كه‌سێ نەسره‌ددین ئیبراهیم بانگ ل مه‌سه‌دێ کر «مه‌رجعیه‌ته‌كا بلندا کوردی» بێ ئاڤاکرن و ل سەر ئاستا نشتیمانی بگهن تێگهشتنەکە بەرفرەهـ و گۆت: «ئه‌ڤ یێك رێ ل بەر چارەسەریەکە سیاسی ڤەدکە».
د داخویانیەکێ دە کو رۆژا ئینی ل سەر مالپەرا فەرمی هاتیە بەلاڤکرن، ئه‌نه‌كه‌سێ راگهاند کو ل گەل گەفێن ترکیێ ژ بۆ داگیرکرنا دەڤەرێن نوو ل باکورێ سووریێ، په‌یه‌ده هەما هەما رۆژانە بەردەوام خوەنیشاندانان ل دار دخە و وێنە و ئالایێن په‌كه‌كێ و عه‌ڤدللا ئۆجالان بلند دكه، هه‌ر وها درووشمێن خیانەتکار ل دژی پارتیێن كوردستانی گور دكه بێی کو سوودێ ژ دەرسێن بەرێ وەربگرن.
ده‌ستنیشان كر، ب ڤێ یه‌كێ ئه‌و هنجەتێن جوربجور ژ بۆ دەستوەردانێ و داگیركرنا رۆژئاڤا ددن ده‌ستێ تركیێ.
داخویانیێ بال کشاند سەر رێڤه‌به‌ریا خوه‌سه‌ر كو سیاسه‌ته‌كه دژبه‌ر دمه‌شینه و گۆتیه: «ئه‌ڤ رێڤه‌به‌ری هێژان بەردەوامە ل سه‌ر کریارێن خوە یێن ترسناک ل دژی وەلاتیان، ئارمانجکرنا هەر کەسێ کو ئیدیۆلۆژیا وێ بنپێ دکە، چ ل سەر ئاستا کەس، رێخستن و هێزێن سیاسی بە، د سەری دە ئەنجومەن و ئالیێن سیاسی یێن د ئه‌نه‌كه‌سێ ده».
سعوود ئەلـ مولا د داخویانیەکێ دە ژ بۆ «ئەشەرق ئەلـ ئەوسەت» بانگ ل ئامەریکا و رووسیایێ کر کو گەفێن ترکیێ و دەستوەردانا وێ یا لەشکەری ل سەر هەرێمێ راوه‌ستینن و گۆت: «ئه‌ڤ یێك دێ ئالۆزیێن زێدەتر ژ بۆ کریزا سووریێ چێبکە و ئازارێن خەلکێ زێدەتر بکە».
