رەڤاندنا جوان و خوەندکاران ب تایبەت کەچان ژ ئالیێ پەکەکێ ڤە ژ بۆی چەکدارکرنا وان د ناڤا رەفێن رێخستنێ دە، ترسەکە مەزن د دلێ دای و باڤێن باژارێ سلێمانیێ دە چێکریە.
ل گۆر ئاگاهیێن تایبەت یێن پێگەها «دارکا مازی» کو ژ چاڤکانیێن خوە یێن ل سلێمانیێ ب دەست خستنە، رێخستنا پەکەکێ ل باژارێ سلێمانیێ خانیەکێ کو دکەڤە تاخا «بەختیاری» وەکە ناڤەندا رەڤاندنا جوانان بکار تینە، هەری داوی ب رێیا ڤێ ناڤەندێ 3 کەچ ژ خوەندەکارێن یەک ژ دبستانێن سلێمانیێ رەڤاندنە و برنە چیا.
چاڤکانیێن مە ئەشکەرە کرن، ب تەنێ ل یەک ژ دبستانێن سلێمانیێ د ئیسال دە، پەکەکێ ب رێیا ڤێ ناڤەندێ 3 کەچێن خوەندکار رەڤاندنە کو یەک ژ وان کەچان سێ ئەزموونێن داویا سالێ ئەنجام دابوون لێ ژ نشکانڤە وەندا دبە.
چاڤکانیێن پێگەها «دارکا مازی» تەکەز کرنە، ژ بەر کو مامێ یەک ژ وان کەچێن هاتنە رەڤاندن د ئاسایشا گشتی یا پارێزگەها سلێمانیێ دە خوەدی ئەرکە، چوویە ڤی خانیێ ل تاخا بەختیاری کو پەکەکە وەکە ناڤەندەک ژ بۆ رەڤاندنا جوانان بکار تینە و گەف ل وان خوارنە کو گەر برازیا وی د دەما 24 دەمژمێران دە ڤەنەگەرینن مالێ، وێ ب هێزەکا ئاسایشێ بچە سەر ڤی خانی و تەڤ کادرۆیێن پەکەکێ یێن ل ور دەستەسەر بکە، ژ بەر ڤێ یەکێ ژی پەکەکە نەچار دبە و د دەما دیارکری دە وێ کەچێ ژ بۆ مالا وێ ڤەدگەرینە.
چاڤکانیێن مە هەر وەها ئەشکەرە کرنە، دەما ئەڤ کەچە دگەهە مالا خوە ژ دایک و باڤێ خوە رە دبێژە، یەک ژ هەڤالێن وێ یێن د سۆسیال مەدیایێ دە ئەڤ کار ب وێ دایە کرن و ئەو ژ بۆی ڤێ مالێ یا کو دکەڤا تاخا بەختیاری شاندیە، لێ هەر کو دگەهە ڤێ مالێ چاڤێن وێ تێن گرێدان و های ژ خوە نامینە، ل دەما چاڤێن وێ تێن ڤەکرن ل جیەک چیایی خوە دبینە، ل گۆر ئاخافتنا ڤێ کەچێ دبە ئەڤ جی ناڤچەیا شارباژێرێ بە.
ژ ئالیەک دن ڤە هات هین بوون کو برێڤەبەریا پەروەردەیا سلێمانیێ، ب نڤیسارەکە فەرمی کو ئاراستەی تەڤ دبستانێن سلێمانیێ کریە، ئەو هایدار کرنە کو نابە ت ئۆتۆبیسەک بێی رەزامەندی و نڤیسارا فەرمی یا دبستانێ ت خوەندکاران ژ بۆی گەشت و سەیرانێ ببە، ژ بەر کو گرۆپەک پەکەکەیی ب هێنجەتا گەشت و سەیرانێ، جوانان ژ خالێن پشکنینێ دەرباس دکن و پشترە وان دبن چیا و د ناڤا رەفێن پەکەکێ دە وان چەکدار دکن.
