ده‌میرتاش: چ په‌یوه‌ندیا هه‌ده‌پێ ب په‌كه‌كێ ڤه‌ نینه‌!!

demirtaş apo-hdp-pkk

هەڤسەرۆکێ بەرێ یێ هه‌ده‌پێ سەلاحەددین دەمیرتاش راگهاند، «چ پەیوەندیا هه‌ده‌پێ ب په‌كه‌كێ ڤه‌ نینە و دخوازم په‌كه‌كه‌ چەکێن خوە ل دژی ترکیێ بێدەنگ بکەت».

سەلاحەددین دەمیرتاش ل گرتیخانەیا ئەدرنەیێ ب رێیا پارێزەرێن خوە بەرسڤ دا کەنالا T24 و راگهاند، چ پەیوەندیا پارتیا دەمۆکراتیکا گەلان هه‌ده‌پێ ب په‌كه‌كێ ڤه‌ نینە و گۆت: «دڤێ ئەم ژ رایا گشتی یا ترکیێ را بێژن هه‌ده‌په‌ نه‌ باسکێ سیاسی یێ په‌كه‌كێ یە،پارتیەک کارێ سیاسی بکە، پێویستیا وێ ب هێزەکە چەکدار نینە».

دەمیرتاش هەروه‌ها گۆت: «وەک کو متهات سانجار د هەڤپەیڤینا خوە یا داویێ دا ژی دیار کربوو؛ هه‌ده‌په‌ نه‌ بەردەوامی، بەردەڤک و ئالیگرێ په‌كه‌كێ یه‌، چ تێکلیا وێ ب په‌كه‌كێ ڤه‌ نینە، دڤێت ئەم ڤێ یەکێ ژ رایا گشتی یا ترکیێ را ڤەبێژین».

دەمیرتاش داخواز ژ په‌كه‌كێ کر کو چەکێن خوە ل دژی ترکیێ بێدەنگ بکەت و وه‌ها ئاخڤی: «هەم دەولەت و هەم ژی په‌كه‌كه‌ دڤێت پرسگرێکێ ژ زەمینا شیدەتێ دەرخینن، ئەز دخوازم په‌كه‌كه‌ چەکان ل هەمبەر ترکیێ ب تەڤاهی بێدەنگ بکەت، لێبەلێ و مخابن، دو ئاستەنگێن سەرەکی هەنە، کو دڤێت هەر کەس بزانیت، یا یەکەم، حکوومەت ژ بلی ئۆپەراسیۆنا لەشکەری ناکەڤیته‌ ناڤا تەڤگەرێ، نیقاشان ناکەت و د بکارئانینا چەکان دە رژدە».

هەروه‌ها گۆت: «لێ ئەم د وێ باوەریێ دانە کو دڤێت په‌كه‌كه‌ بهێته‌ رازی كرین. د ڤیرێ دا ژی ئاستەنگا دویەمین دەردکەڤیته‌ هۆلێ، ئەو ژی تەجریدا ل ئیمرالیێ یە، چونكی کەسێ کو دشێت په‌كه‌كێ رازی بکەت، ئۆجالانە، ئەو ژی ب سالانە د تەجریدێ دا هشتنە، تەڤی ڤان ئاستەنگان ئەگەر په‌كه‌كه‌ چەکێن خوە بێدەنگ بکەت، ئەز دێ ژ ڤێ یەکێ کێفخوەش ببم، لێ بەلێ ئەزموونێن مە نیشان دانە کو مخابن ئەڤ یەک نە هێسانە».

پوستێن ھەمان بەش