پەکەکێ کارمەندەکێ دەزگەھێ خێرخوازی یێ بارزانی رەڤاند

چەکدارێن پەکەکێ خۆرتەکێ خەلکێ دەڤەرا چۆمان یا ھەرێما کوردستانێ رەڤاندن کو بۆ گەریانێ چووبوو گوندەکێ قەندیلێ.

ل گۆری ئاگاھیێن کو چالاکڤانێن باشوورێ کوردستانێ د سۆسیال مەدیایێ دا پارڤەکرنە، خۆرتەکێ 28 سالی ب ناڤێ «دەریا محەمەد» خەلکێ باژارۆکێ چۆمان یێ ھەرێما کوردستانێ دوھ ل گوندێ زارگەلی ل بنارا چیایێ قەندیل ژ ئالیێ چەکدارێن پەکەکێ ڤە ھات رەڤاندن.

ل گۆری ئاگاھیان، ئەڤ خۆرتە بۆ گەریان و یاریکرنێ چووبوو وی گوندی لێ د رێ دا ژ ئالیێ پەکەکێ ڤە ھات رەڤاندن.

برایێ وی خۆرتی ب ناڤێ «بێستوون محەمەد» ژ بۆ کانالا کوردستان تیڤی گۆتیە، برایێن من و چەند ھەڤالێن خوە چووبوون گوندێ زارگەلی بۆ فوتبۆلێ لێ چەکدارێن پەکەکێ د ناڤ وان دا تەنێ برایێ من رەڤاندنە و برنە.

بێستوون محەمەد ھەر وھا گۆتیە، ئەم نزانین برایێ من چما رەڤاندنە. مە ئالیێن پێوەندیدار ئاگاھدار کرنە.

ل گۆر ئاگاھیان، ئەو کەسێ کو ھاتیە رەڤاندن، خوەدان ژن و زارۆکە و کارمەندێ دەزگەھێ خێرخوازی یێ بارزانییە.