سەرۆکێ ھەرێما کوردستانێ نێچیرڤان بارزانی دەربارێ تۆپبارانکرنا ئیرۆ یا ل سنۆرێ ئیدارەیا سەربخوە یا زاخۆ داخویانیەک بەلاڤ کر و راگھاند، “شەر و پەڤچوونێن ناڤبەرا ئارتێشا ترکیێ و چەکدارێن پەکەکێ ل سەر سینۆران ب تەمامی ھاتیە رەدکرن و نایێ قەبوولکرن و ئاساییش و ئارامیا ھەرێما کوردستانێ و سینۆرێن ناڤدەولەتی یێن ئیراقێ خراب کریە و بوویە سەدەما ڤالاکرنا سەدان گوندێن ناڤچەیێ، ئەم بۆمبەبارانا ئیرۆ یا سینۆرێ زاخۆیێ ب توندی شەرمەزار دکن، کو د ئەنجامێ دا ھەژمارەک وەلاتیێن سڤیل و گەشتیار ل ناڤچەیێن جودایێن ئیراقێ ھاتن کوشتن و ھەژمارەکە دن ژی بریندار بوون”.
داخویانیا سەرۆکێ هەرێما کوردستانێ ب ڤی ئاوایە:
ئەم بۆمبەبارانا ئیرۆیا سینۆرێ زاخۆیێ ب توندی شەرمەزار دکن، کو د ئەنجامێ دا ھەژمارەک وەلاتیێن سڤیل و گەشتیار ل ناڤچەیێن جودایێن ئیراقێ ھاتن کوشتن و ھەژمارەکە دن ژی بریندار بوون.
بۆمبەباران و دوبارەبوونا شەر و پەڤچوونێن ناڤبەرا ئارتێشا ترکیێ و چەکدارێن پەکەکێ ل سەر سینۆران ب تەمامی ھاتیە رەدکرن و نایێ قەبوولکرن و ئاساییش و ئارامیا ھەرێما کوردستانێ و سینۆرێن ناڤدەولەتی یێن ئیراقێ خراب کریە و بوویە سەدەما ڤالاکرنا سەدان گوندێن ناڤچەیێ.
ئەم ژ مالباتێن قوربانیان رە سەرساخیێ دخوازن و ژ برینداران رە ژی شفایێ دخوازن. نەخوەشخانە و ئالیێن پەیوەندیدارێن ھەرێما کوردستانێ دێ ھەموو ئالیکاری و خزمەتگوزاریان پێشکێشی بریندار و بەرکەتیان بکن.
دڤێ ئارتێشا ترکیێ و چەکدارێن پەکەکێ شەری راوەستینن و ئێدی ل ناڤچەیێن سینۆری نەبن سەدەما کوشتن و وێرانیێ و شەر و فەلاکەتا خوە ل سەر ستوویێ خەلکێ ھەرێما کوردستانێ راکن. پێدڤییە حکوومەتا ئیراقا فەدەرال ھەموو تەدبیران وەربگرە کو رێگریێ ل دووبارەبوونا ڤان تاوانان بکەت و ئەولەکاریا وەلاتێن جیران ژ خاکا ئیراقێ نەکەڤە مەترسیێ.
نێچیرڤان بارزانی
سەرۆکێ ھەرێما کوردستانێ
