سه‌رۆكوه‌زیر هه‌رێما كوردستانێ ده‌ربارێ ئێریشا ئیرۆ یا ده‌وله‌تا ترك ل سینۆرێ زاخۆیێ داخویانی دا و راگهاند، ئێریشكرنا سه‌ر گه‌لێ سڤیل چ به‌هانه ژ بۆ نینه.
مه‌سروور بارزانی سه‌رۆكوه‌زیرێ هه‌رێما كوردستانێ ئیرۆ رۆژا چارشه‌مبی 20/7/2022ێ ده‌ربارێ ئیریشا سه‌ر هاڤینگه‌ها گوندێ په‌ره‌خێ داخویانی دا و ته‌ڤی كو ئێریش ب توندی شه‌رمه‌زار كر گۆت: «چ به‌هانه ژ بۆ ئێریشكرنا سه‌ر خه‌لكێ سڤیل نینه».
سه‌رۆكوه‌زیر هه‌روه‌ها دبێژه: «به‌رده‌وام هاتیه راكێشان بۆ ناڤ شه‌رێ تركیێ و په‌كه‌كێ دا كو زه‌ره و زیانه‌كا مه‌زن گه‌هاندیه هاولاتیان و دڤێت ئه‌ڤ شه‌ر ب داوی بهێت».
مه‌سروور بارزانی ل داویا په‌یامێ گۆت: «ئه‌م هه‌ڤخه‌مین ل گه‌ل مالباتێن قوربانیان«.
ئیرۆ یێك ژ هاڤینگه‌هێن سینۆرێ ئیداره‌یا سه‌ربخوه یا زاخۆیێ كو ل گوندێ په‌ره‌خێ یه، راستی ئێریشه‌كه مووشه‌كی هات و ب وێ سه‌ده‌مێ 9 وه‌لاتیێن ئیراقی كو ب كو ئارمانجا گه‌شتوگوزارێ سه‌ردانا وێ ده‌رێ كربوون شه‌هید كه‌تن و هه‌روه‌ها 23 كه‌س بریندار بوونه.
ئه‌ڤ ئیریش ل ئیراقێ و هه‌رێما كوردستانێ ل ئاستا ژوور هات شه‌رمه‌زار كرن و له‌كۆلینان ده‌ست پێ كریه.
