پارتییا ئازادییا کوردستانێ (پاک) ب بۆنەیا سالڤەگەرا 99ەمینا پەیمانا لۆزانێ، داخویانیەک نڤیسکی بەلاڤ کر و تێ دە راگهاند، دڤێ ئەو نەهەقیا د پەیمانێ ده ل کوردان هاتیە کرن، بێ به‌ده‌ل ڤه‌كرن.
داخویانیا بورۆیا چاپەمەنی و راگەهاندنێ یا پاکێ:
پەیمانا لۆزانێ د رۆژا 24/7/1923 یان دا، ل باژارێ لۆزانا ئیسڤیچرەیێ، د ناڤبەرا،دەولەتا ترکیێ، ئینگلتەرە، فرانسا، ئیتالیا، ژاپۆنیا، یوونانیستان، رۆمانیا، بوولگاریستان، پۆرتەکیز، بەلجیكا و یوگۆسلافیایێ دا هاتە ئیمزە کرن.گەلەک مژارێن ڤێ پەیمانێ هەبوون. لێ مژارەکە ئەساسی دابەشکرنا ئاخا کوردستانێ یا د بن دەستهلاتدارییا ئۆسمانییان دە بوو.
ب پەیمانا لۆزانێ ڤە ئاخا کوردستانێ یا د بن دەستهلاتدارییا ئۆسمانییان دە د ناڤبەرا دەولەتا ترکیێ، ئینگیلتەرە و فرانسایێ دا هاتە دابەش کرن. پاشێ بەشێ د بن دەستهلاتدارییا ئینگیلتەرە دا ژ دەولەتا ئیراقێ را، بەشێ د بن دەستهلاتدارییا فرانسایێ دا ژی ژ دەولەتا سووریێ را ما.
پەیمانا لۆزانێ رێ ڤەکر کو کوردستان ژ نوو ڤە بێ داگیر کرن و نوها ژی ل سەر وی ئەساسی کوردستان ژ ئالیێ دەولەتێن ترکیە، ئیران، ئیراق و سووریێ ڤە هاتییە داگیر کرن.
پەیمانا لۆزانێ، تونە كرن و بنپێ کرنا ئیرادەیا گەلێ کوردستانێ یە، نە مەشرووعە، نە یاسایی یه.
تەکۆشینا ئازادییا کوردستانێ یا ل هەر چار پەرچەیێن کوردستانێ، هەر رۆژ، ب بدەست خستنا دەستکەفتییێن گرنگیێن دیرۆکی، دەرزێ ل پەیمانا لۆزانێ دخە.
تو گومانا مە ژێ تونەیە کو رۆژەک دێ بێ، وێ گەلێ مە ب تێکۆشینا خوە و ب پشتگرییا دۆستێن خوە یێن ناڤنەتەوی، ڤێ پەیمانا قرێژ باڤێژە د زبلدانا دیرۆکێ ده و دێ هەر چار پەرچەیێن کوردستانێ ژی ئازادییا خوە بدەست بخن.
د 99ەمین سالڤەگەرا پەیمانا لۆزانێ دا ئەم بانگی دەولەتێن وەک ئینگیلتەرە، فرانسا، ئەمەریکا، رووسیا، ئالمانیا و دەولەتێن جیهانێ دکن، ڤێ نەهەقییا کو ب پەیمانا لۆزانێ ل گەلێ کوردستانێ هاتیە کرن تەلافی بکن، ڤێ نەهەقیێ ژ هۆلێ راکن.
د دەمەکى کو ل رۆژهلاتا نێزیک و رۆژهلاتا ناڤین دا ژ نوو ڤە نەخشە تێنە چێکرن، هەموو دەولەتێن جیهانێ دڤێ ل هەر چار پەرچەیێن کوردستانێ، پشتگرییا مافێ ئازادی، ستاتوتەیەکە سیاسی، جۆگرافی، نەتەوەیی و خوە ب خوە ئیدارە کرنا گەلێ کوردستانێ بکن. ئەم بانگی گەلێن ڤان دەولەتێن جیهانێ دکن دا کو ب زەخت و هێزا خوە یا ل سەر دەستهلاتداریێن دەولەتا خوە، ببن پشتگر، ئالیکار، هەڤالبەند و ئاکتۆرێن پێک ئانینا ئازادییا گەلێ کوردستانێ.
پەیمانا لۆزانێ هەلبەتە کو ب هەبوون، تێکۆشین، یەکگرتن و تفاقا گەلێ کوردستانێ یا نەتەوی، دەمۆکراتیک دێ بێ تونە کرن. گەلێ کوردستانێ دڤێ ب سەبر و ب سیاسەتەکە ئاقلانە، د قادا ناڤنەتەوی دا دۆستێن خوە زێدە، دژمنێن خوە کێم بکە دا کو ئەم بکاربن پێڤاژۆیا ئازادییا هەر چار پەرچەیێن کوردستانێ کورتر بکن.
