پێنج گه‌ریلایێن په‌كه‌كێ ل هه‌رێما حه‌فته‌نینێ یا باشوورێ كوردستانێ كه‌تنە به‌ر ئێریشا بالەفرێن ترکیێ و ژیانا خوه ژ ده‌ست دانە، جه‌سه‌دێن وان ژی هێژان ل ده‌ریێ تۆنەلێ مانه.
چاڤكانیێن پێگه‌ها «داركا مازی» ئه‌شكه‌ره كرن، شه‌ڤا 28 سه‌ر 29 خزیرانا ئیسال 2022یێ ل هه‌رێما حەفتەنینێ ب تایبه‌ت ل «شیڤە مێزێ» 5 گه‌ریلایێن په‌كه‌كێ وەختا ژ تونەلێ دەردکەڤن، درۆنەکە ترکیێ وان دبینە و یەکسەر لێ دخە و هەر 5 گەریلایان د کوژە، دەما دبە سحار، ئارتێشا تركیێ تیمێن «خەنجەر» دشینه جهێ کو جنازە لێ مای.
چاڤکانیێن «داركا مازی» ل وێ هەرێمێ ده‌ستنیشان كرن، تیمێن خه‌نجه‌ر چه‌كێن گران ژی ل گه‌ل چه‌كێ ب ملێ خوه ڤه برن، وه‌ختا گه‌هشتنێ، جارەک دن ژی وان جه‌سه‌دێن گه‌ریلایێن مری گوللـه‌باران کرن.
ل گۆری ئاگاهیێن ده‌ستێ مه دا، جه‌نازه‌یێن هه‌ر 5 گه‌ریلایان هێژان ل نێزیکی ده‌ریێ تونەلا «شیڤە مێزێ» مانه، و هەیا نها پەکەکێ خوە ل وان جەنازەیان خوەدی نەدرخستیە و چ هەولەک جدی ژ بۆی راکرن و بن ئاخ کرنا جەنازەیێن خوە نەدایە، جەنازەیێن گەریلایان ل ور د بن چەنگالێن چەقەلان بێی خوەدی مانە.
تیمێن خه‌نجه‌ر كی نه و چما هه‌یا نها په‌كه‌كێ چ یەك ژ وان نه‌كوشتیه؟
تیمێن خەنجەر ب گرووپێن «کۆنترا گه‌ریلا» تێن ناس كرن، ئه‌و ژ جه‌حشێن کورد تێن چێكرن، ئەڤ گرووپه ئەهلێ په‌ره‌یانه و پر ب بێره‌حمی کوشتنێ دکن.
ئارتێشا تركیێ و میت هه‌ر جهه‌كێ مەترسیدار به، تێمێن خه‌نجه‌ر دشینێ، ئەڤ تیم ژ سالێن 90 ێ ڤە ل گەل ئارتێشا تركیێ و میتێ کار دکن، هەیا نەها ب دەهان گەریلا ب دەستێن وان هاتنه تەسفیه كرن، تشتا عەجێب ئەوە کو په‌كه‌كه ڤانا ناس دکە لێ هەیا نها چ کەس ژ وان ب دەستێ په‌كه‌كێ نە هاتیە کوشتن!!.
