ل ناڤچەیا نسێبینێ یا سەر ب پارێزگەھا مێردینێ یا باکورێ کوردستانێ ئارتێشا ترکیێ ئۆپەراسیۆنەکا نوویا لەشکەری دا دەستپێکرن و ژ بەر ڤێ ئۆپەراسیۆنێ ل گوندێ مەربابێ قەدەغەیا چوونووھاتنێ ھات راگھاندن. وەزارەتا ناڤخوەیا ترکیێ ژی راگھاند کو د ئەنجاما ئۆپەراسیۆنێ دا 3 کەسێن کو ھەول دانە ژ رۆژئاڤایێ کوردستانێ ب قاچاغی دەرباسی باکورێ کوردستانێ ببن ژ ئالیێ ھێزێن ترکیێ ڤە ھاتنە کوشتن.
ل گۆر داخویانیا پارێزگاریا مێردینێ ل گوندێ مەربابێ سەر ب ناڤچەیا نسێبینێ ئارتێشا وی وەلاتی ل دژی گەرلایێن پەکەکێ ئۆپەراسیۆنەک لەشکەری دا دەستپێکرن و ب ئارمانجا ئەولەکاریا جان و مالێ وەلاتیان ژ ئیرۆ پێنجشەمبێ 28ێ تەمووزا 2022یێ دەمژمێر 05:00 ھەتا بریارەکا دن قەدەغەیا چوونووھاتنێ ھاتیە راگھاندن.
ھەروھا د داخویانیێ دا ھشیاری بۆ وەلاتیان تێ دایین کو ب ئارمانجا ئەولەکاریا خوە پابەندی بریارێ بن.