روفاتێن 100 بارزانیێن ئەنفالکری بۆ کوردستانێ هاتن ڤەگەراندن

ئیرۆ شەمیێ روفاتێن 100 شەهیدێن ئەنفالکری یێن بارزان، ب رێیا فرۆکەخانەیا هەولێرێ هاتن ڤەگەراندن و بریارە سبە ل دەڤەرا بارزان ب خاکێ بێنە سپارتن.

روفاتێن 100 ئەنفالکریێن بارزانیان گهان فرۆکخانەیا ناڤدەولەتی یا هەولێرێ و مەراسیمەکە تایبەت ژ بۆ پێشوازیکرنا وان ب ئامادەبوونا سەرۆک مەسعوود بارزانی، سەرۆکێ هەرێما کوردستانێ نێچیرڤان بارزانی، نوونەرا نەتەوەیێن یەکبوویی ل ئیراقێ ژنین هەننس پلاسسخارت و هەژمارەکە بەرپسێن حکوومەتا هەرێما کوردستانێ و ئیراقێ و چەند بەرپرسێن حزبی برێڤە دچە.

روفاتێن 100 بارزانیان ژ بیابانا عەرعەر یا ل پارێزگەها مۆسەنا یا باشوورێ ئیراقێ بۆ هەرێما کوردستانێ هاتن ڤەگەراندن و بریارە سبە یەکشەمێ  31ێ تیرمەهێ د مەراسیمەکە تایبەت دە ل دەڤەرا بارزان ب خاکێ بێنە سپارتن.

رووفاتێن شەهیدێن ئەنفالکریێن بارزانیان د گۆرێن ب کۆم یێن بیابانێن عه‌رعه‌را ل باشوورێ ئیراقێ هاتبوون دیتن.

ل گۆری لێکۆلینێن کو ژ ئالیێ پسپۆران ڤە هاتنە کرن، دیار بوویە کو ئەو کەس بارزانی نە. ئەڤ کاروانێ سێیەمێ ئەنفالکریانە کو تێنە هەرێما کوردستانێ. 

ل گۆری پزیشکیا دادی یا ئیراقێ، تەڤاهیا وان روفاتان یێن مێرانە، زارۆک و ژن د ناڤا وان دە نینن.

د دیرۆکا 31/7/1983ان دە کۆمارا ئیراقێ د پێلەکێ دە 8 هەزار بارزانی یێن د کۆمەلگەهێن ب زۆرێ نشتەجیکرییێن ل قوشتەپە، بەحرکێ، دیانا و حەریرێ ئەنفال کرن.

پشتی سالا 2003ان ل بیابانێن عه‌رعه‌ر روفاتێن 596 بارزانیان هاتن دیتن و د دو دەمێن جودا دە هاتنە ڤەگەراندن بۆ بارزان و ل گۆرستانا ئەنفالا بارزانیان دە ب ئاخێ هاتنە سپارتن.

رەژیما سەدام حسێن د سالا 1983ان دە پرۆسەیا ئەنفالا کوردان ب ئەنفالکرنا 8 هەزار بارزانیان دەست پێ کر.