په‌كه‌كێ ترومبێل و 10 هەزار دۆلار وه‌كه‌ باج ژ جۆتكاره‌كێ باشوور ستا‌ندن

چەکدارێن پەکەکێ، وه‌كه‌ باج ترومبێل و 10 هه‌زار و 500 دۆلار پاره‌ ژ یێك ژ جۆتكارێن هه‌رێما كوردستانێ ستا‌ندن، پاش كو رێخستنێ ئه‌ڤ پا‌ره‌ ژ جۆتكاری وه‌رگرتی، ژ نوو ڤه‌ ئه‌و سه‌ربه‌ست به‌ردا.

چاڤکانیێن تایبەت یێن پێگەها «دارکا مازی» ئەشکەرە کرن، چەکدارێن پەکەکێ ل رۆژا 12 تیرمه‌ها 2022ێ ل سینۆرێ گوندێ «بێرکمە» یێ سەر ب باژارۆکێ سیدەکانێ ڤه‌، ولاتیێ ب ناڤێ «حەکیم یاسین خەیلانی»، دەما خوەستی بەر ب زۆزانان ڤه‌ بچە ژ هێلا چه‌كدارێن په‌كه‌كێ ڤه‌ تێ ده‌سته‌سه‌ر كرن، هەر وەها دەست ب سه‌ر ترومبێلا وی یا ژ جورێ نیسان پیكئاپ دا ژی دگرن.

چاڤکانیێن مە ئاشکەرەا کرن، ل گۆری ئاخافتنا چەکدارێن سەر ب پەکەکێ ب خوە، ژ بەر کو ئەڤ وه‌لاتی بازرگانیا حەیوان و پەز دکە و پێش نها هندەک حەیوان ئانینە و باج ب پەکەکێ نەدایە، لەوما ئه‌و هاتیە دەستەسەرکرن.

ژ بلی دەسته‌سه‌ر كرنا ڤی ولاتیێ باشوور، هەر وها چەکدارێن پەکەکێ دەست دانایە سەر ترومبێلا وی و ئەو ب 3 ملیۆن دیناران سزا کریە، پاش دانا ڤی سزایێ پا‌ره‌یان، ئەو سەربەست تێ بەردان.

چاڤکانیێن مە هەر وەها تەکەز کرن، ل رۆژا 13/7/2022ێ، وه‌لاتی حەکیم یاسین خەیلانی لگەل مامۆستەیەک ئایینی و هندەک رهسپیێن دن دا ب مەرەما وەرگرتنا ترومبێلا خوە دچن جەم چەکدارێن پەکەکێ، لێ بەلێ چەکدارێن پەکەکێ ل همبەر رادەستکرنا ترومبێلا وی ژی، داخوازا پارەیان ژ وی کریە، ژ بەر ڤێ یەکێ ئه‌ڤ جۆتكارێ ب ناڤێ حه‌كیم ب نەچاری 10 هەزار و 500 دۆلاران ل همبەری وەرگرتنا ترومبێلا خوە ب چەکدارێن پەکەکێ ددە.