پشتی بانگا سەرۆکێ هەرێما کوردستانێ نێچیرڤان بارزانی یا ژ بۆ هەموو ئالیێن ئیراقێ کو ل هەولێرێ بجڤن و چارەسەریەکێ ژ بۆ رەوشا ئیراقێ ببینن، بلۆکا چارچۆڤەیا هەماهەنگیێ (یا نێزیک ژ ئیرانێ) پێشوازی ل ڤێ بانگا نێچیرڤان بارزانی ژ بۆ دیالۆگا نشتمانی کر.
سەرۆکێ هەرێما کوردستانێ دۆهـ یەکشەمبێ 31ێ تیرمەها 2022ێ د داخویانیەکێ دە راگهاند، ئەو ب دلگرانیەکە زێدە رەوشا سیاسی یا ئیراقێ دشۆپینە و بانگ ل هەموو ئالیێن سیاسی یێن ئیراقی کر کو ل هەولێرێ بجڤن و ژ بۆ چارەسەریا پرسگرێکان دەست ب دیالۆگەکە ڤەکری بکن.
نێچیرڤان بارزانی د داخویانیا خوە دە ئاماژە ب وێ یەکێ کریە کو هەرێما کوردستانێ دێ هەر دەم بەشەک بە ژ چارەسەریێ.
سەرۆکێ کۆمبوونا سەنەد یا نشتیمانی و بەردەڤکێ چارچۆڤەیا هەڤاهەنگیێ ئەحمەد ئەل ئەسەدی، دەربارێ ڤێ دەستپێشخەریا نێچیرڤان بارزانی دە ل سەر تویتەرێ هەلوێستا وێ بلۆکا سیاسی یا نێزیک ل ئیرانێ ئاشکەرە کر.
ئەحمەد ئەل ئەسەدی دبێژە، چارچۆڤەیا هەماهەنگیێ پێشوازی ل ڤەخوەندن و بانگا سەرۆکێ هەرێما کوردستانێ نێچیرڤان بارزانی دکە ژ بۆ دیالۆگا نشتیمانی و تەکەز دکە، ئەو ژ بۆ چارەسەرکرنا کریزا نها ئامادەنە دا کو بگهن چارەسەریێن راستەقینە کو دەستوور و یاسا و بەرژەوەندیا گەلێ ئیراقێ بنگەها وان بە.
ئەو 3 رۆژن ب هەزاران خوەپێشاندەرێن ئالیگرێن تەڤگەرا سەدر ل سەر بانگا رێبەرێ وێ تەڤگەرێ موقتەدا سەدر دەرباسی ناڤچەیا کەسکا بەغدایێ بوونە و ئاڤاهیا پارلامەنتۆیێ کۆنترۆل کرنە.
خوەپێشاندەر دبێژن، هەتا موقتەدا سەدر بریار نەدە و ژ وان نەخوازە، ئەو ژ ئاڤاهیا پارلامەنتۆیێ و ناڤچەیا کەسک ڤەناکشن.
ل ئالیەکێ دن رێبەرێ تەڤگەرا سەدر موقتەدا سەدر شەڤێ دن د پەیامەکێ دە خوەپێشاندانێن ئالیگرێن خوەیێن ل ناڤچەیا کەسکا بەغدایێ و پارلامەنتۆیا ئیراقێ وەکە «شۆرەشەکە ئاشتیانە» ب ناڤ کر و بانگ ل هێزێن ئەولەهیێ و گەل کر کو پشتگریێ بدن «شۆرەشێ».
