ل ناڤچەیا سورێ سەر ب پارێزگەھا ئامەدێ یا باکورێ کوردستانێ ل تاخێن «زەینکان، زۆزنجا مەزن و یەشل» نێزیکا 3 مەھانە ئاڤا ڤەخوارنێ نینە و لگەل کو نیشتەجھێن تاخان سەرلێدانا رێڤەبەریا ژێرخانە و ئاڤێ یا گرێدایی شارەداریا پارێزگەھێ کرنە چ ئەنجام ب دەست نەخستنە.
پارلامەنتەرا ھەدەپێ یا ئامەدێ «رەمزیا تۆسون» ل سەر حەسابا خوە یا تویتەرێ دەربارێ مژارێ پەیامەک بەلاڤ کر و گۆت: “ل ئامەدێ 3 تاخێن گرێدایی ناڤچەیا سورێ 3 مەھێن بێ ئاڤن. لگەل کو نیشتەجھێن تاخان د سەری دا رێڤەبەریا ژێرخانە و ئاڤێ یا ئامەدێ و ھەموو سازیێن پەیوەندیدار ئاگاھدار کرنە لێ ئەڤە 3 مەھن چ چارەسەریەک نەھاتیە دیتن. ئەم شۆپدارێ مژارێ نە.”
تۆسون راگھاند کو دەربارێ مژارێ دا پرسیارنامەیەک بۆ وەزیرێ ناڤخوە و وەزیرێ چاندنی و دارستانێ پێشکێش کرنە و ژ بۆ پرسگرێک بێ چارەسەرکرن دێ پرۆسەیێ ب شۆپینن.
ل گۆر گۆتنا نیشتەجھێن تاخان ئەو بخوە ئاڤا ڤەخوارنێ پەیدا دکن و دەرڤەیی تاخێن وان ل چەند تاخێن دنیێن سورێ ھەمان پرسگرێک ھەیە و بۆریێن ژێرخانەیا باژێر ژی ل گەلەک جھان شکەستنە و زەرارەکا مەزن دیتنە.
بەریا چەند رۆژان پارلامەنتەرێ ھەدەپێ «گارۆ پایلان» ژی دەربارێ ھەمان پرسگرێکێ یا ل گوندێن ناڤچەیا چەرمووکێ یا سەر ب پارێزگەھا ئامەدێ پرسیارنامەیەک بۆ پارلامەنتۆیا ترکیێ پێشکێش کربوو.
