چەکدارێن پەکەکێ ل شێلادزێ بارەگایێ لەشکرێ ترکیێ ئارمانجکر و پشت رە رەڤیان و خوە د ناڤا گوندێن وێ دەڤەرێ ڤەشارت.
ئێڤارا ئیرۆ رۆژا چارشەمیێ، چەکدارێن پەکەکێ ل گوندێن دەردۆرا شێلادزێ بارەگەها لەشکرێ ترکیێ ب مۆشەکەکی هەدەف کر و پشترە رەڤیان و خوە د ناڤا سڤیلان دە ڤەشارت، ژ بەر ڤێ یەکێ ژی لەشکرێ ترکیێ جیهێ گومان لێ تێ کرن ل ور بارەگەها وان هاتبە هەدەف گرتن تۆپباران کر.
یەک ژ وەلاتیێن شێلادزێ کو ژ بەر پاراستنا جانێ خوە نەخوەست ناڤێ وی وەرە ئەشکەرە کرن ژ دارکا مازی رە راگهاند، چەکدارێن پەکەکێ ژ ئالیێ گوندێن زێباریا ڤە کو دکەڤن نێزی شێلادزێ بارەگەهێ لەشکرێ ترکیێ ل سیریێ هەدەف گرت و پشترە رەڤیان، پشتی ڤێ ئێریشێ لەسکرێ ترکیێ دەردۆرا گوندان هەدەف گرتن و نها دەنگێ بالەفرێنکەشفێ یێن دەولەتا ترکیێ ژی تێ بهیستن، ئەڤ یەک ژی بوویە سەدەما دروستبونا ترسێ ل جەم ولاتیان.
ئەڤ ولاتیێ شێلادزێ دبێژە، هەر کەس دزانە مەرەما پەکەکێ ژ ڤان پرۆڤاکسیۆنان چییە، هەر کەس دزانە پشتی کو پەکەکێ چیایێ کورەژار تەسلیمی دەولەتا ترکیێ کری، نها دخوازە ب ڤان پرۆڤاکسیۆنێن خوە شەرێ خوە یێ سەختە ب دەولەتا ترکیێ رە بینە ناڤا گوند و باژارێن باشوور دە، پەکەکە بوویە پرا دەرباسبوونا لەشکرێ ترکیێ ژ بۆی داگیرکرنا کوردستانێ.
هەر وها تەکەز کر، گەر پەکەکە دخوازە ئێریشی بارەگەهێن ترکیێ بکە، بلا بچە و بارەگەهێن ترکیێ یێن ل سەر خاکا باکورێ کوردستانێ هەدەف بگرە، نە کو وەرە باشوور و ببە سەدەما زرار گهاندن ب گەلێ باشوور، ل باکور ئەوقاس بارەگەهێن لەشکری یێن ترکیێ هەنە کو گەر بخوازە ئێریشی وان بکە دکارە هەر رۆژ ئێریشەکێ پێکبینە، لێ پەکەکە ڤێ یەکێ ناکە، و هەر کەس باش دزانە چما پەکەکە ب ڤی ئاوا تەڤ دگەرە، ئەو دخوازە باشوور ژی تەسلیمی ترکیێ بکە و ستاتویا هەرێما کوردستانێ ژ ناڤ ببە.
