ل پارێزگەها جۆلەمێرگێ یا باکورێ کوردستانێ، ئارتێشا ترکیێ ئۆپەراسیۆنەکە نوو یا ب ناڤێ «ئەرەن دۆرپێچ-29» دا دەستپێکرن.
وەزارەتا ناڤخوە یا ترکیێ، ئیرۆ 4ێ تەباخا 2022ێ ب داخویانیەکێ راگهاند کو ل پارێزگەها جۆلەمێرگێ یا باکورێ کوردستانێ، ئۆپەراسیۆنەکە نوو یا لەشکەری هاتیە دەستپێکرن.
ل گۆر داخویانیا وەزارەتا ناڤخوە یا ترکیێ، ل پارێزگەها جۆلەمێرگێ یا باکورێ کوردستانێ ئۆپەراسیۆنا ب ناڤێ «ئەرەن دۆرپێچ -29» ب بەشداربوونا 632 لەشکەرێن سەر ب فەرمانداریا جەندرمە و گوندپارێزان دەستپێ کریە.
ئۆپەراسیۆنێن ترکیێ نێزیکی هەشت مەهانە ب ناڤێ ئۆپەراسیۆنێن «ئەرەن» ل ناڤچەیێن جودا یێن سینۆرێ پارێزگەهێن ئامەد، مێردین، دێرسم، شرنەخ، جۆلەمێرگ، ئاگری، بەدلیس، ئیدر، قەرس، ئەردەخان و چەند ناڤچەیێن دن یێن باکورێ کوردستانێ دەستپێ کرنە و بەردەوامن.
