نەتەوەیێن یەکبوویی: ھەتا نھا 200 ھەزار ئێزدی ل ھەرێما کوردستانێ ئاوارە نە

 نەتەوەیێن یەکبوویی ئیرۆ پێنجشەمبێ راگھاند، زێدەتری 200 ھەزار کوردێن ئێزدی کو ژ جینۆسایدا داعشێ رزگار بوونە، ھێژ ژی ل ھەرێما کوردستانێ ئاوارە نە.

رێخستنا ناڤدەولەتی یا کارووبارێن ئاوارەیان یا سەر ب نەتەوەیێن یەکبوویی ب داخویانیەکێ دیار کر، پێویستیێن ئاوارەیێن ئێزدی (کو ھەتا نھا پرانیا وان ل ھەرێما کوردستانێ دژین) گەلەک زێدە نە.

نەتەوەیێن یەکبوویی دەستنیشان کر، دژواریا ژیانا ئاوارەیێن ئێزدی وسا دکە کو تەنێ پێویستیێن خوەیێن رۆژانە داخواز بکن.

نەتەوەیێن یەکبوویی ژ حکوومەتا ئیراقێ و جڤاکا ناڤدەولەتی داخواز دکە، کەش و ھەوایەکێ ووسا پێک بینن کو بوویەرێن ب سەر ئێزدیان دا ھاتین، دوبارە نەبن و ژ بۆ ڤەگەرا وان یا بۆ ژیان و ئاڤەدانکرنا دەڤەرێن وان، ئالیکار بن.

سالا بۆری تیمەکە لێکۆلینێیا نەتەوەیێن یەکبوویی بەلگەیێن بەردەستێن ل سەر جینۆسایدا ئێزدیان ئاشکەرا کرن. ل گۆر زانیاریێن وێ تیمێ، ھەتا نھا ژی 2700 ئێزدی ژ ئالیێ داعشێ ڤە ھاتنە ونداکرن.