ئارتێشا ترکیە ل چیایێ باگۆکێ یێ پارێزگەها مێردینێ یا باکورێ کوردستانێ ل دژێ گەرلایێن په‌كه‌كێ دەست ب ئۆپەراسیۆنەکە نوو یا ب ناڤە «ئەرەن -دۆرپێچ 31» کر کو 528 لەشکەر، گوندپارێز و پۆلیسێن تایبەت ب 44 تیمێن جودا تێدە بەشدارن.
ل گۆر داخویانیەکە کو ژ ئالیێ وەزارەتا ناڤخوە یا ترکیێ ڤە هاتیە بەلاڤ کرن، ئارتێشا وی وەلاتی ئیرۆ 7ێ تەباخا 2022ێ ل پارێزگەها مێردینێ دەست ب ئۆپەراسیۆنا ب ناڤە «ئەرەن – دۆرپێچ 31» کریە 528 لەشکەر، گوندپارێز و پۆلیسێن تایبەت ب 44 تیمێن جودا تێدە بەشدارن.
د داخویانیێ دە ئاماژە ب وێ یەکێ هاتیە دایین کو ئۆپەراسیۆن ل چیایێ باگۆکێ یێ مێردینێ ل دژی گەرلایێن په‌كه‌كێ هاتیە دەستپێکرن و تەکەزی ل بەردەوامیا ئۆپەراسیۆنێن دن ژی هاتیە کرن.
زنجیرە ئۆپەراسیۆنێن ئارتێشا ترکیێ یێن ب ناڤێن جودا ژ سالا 2017ێ ڤە ل باکورێ کوردستانێ ب بەردەوامی تێن کرن. ئارتێشا ترکیێ ئەڤ دەردۆرا 9 مەهانه ب ناڤێ ئۆپەراسیۆنێن «ئەرەن» ل ناڤچەیێن جودایێن سینۆرێ پارێزگەهێن ئامەد، مێردین، دێرسم، شرنەخ، جۆلەمێرگ، ئاگری، بەدلیس، ئیدر، قەرس، ئەردەخان وچەند ناڤچەیێن دن یێن باکورێ کوردستانێ دەست ب زنجیرە ئۆپەراسیۆنێن خوە یێن نوو کریە و ئەو ئۆپەراسیۆن بەردەوامن.
