د مەها رابووری دا میلیشیایێن ب ناڤێ «کەتائب حزب الله» یێن سەر ب حەشدا شەعبی ڤە ل باژارێ کەرکووکێ، 3 مال شەوتاندنە و ل سەر دیوارێن وان مالان نڤیساندیە سیخۆر.
ل گۆر ئاگاهیێن تایبەت یێن پێگەها «دارکا مازی» ل شەڤا 7/7/2022ێ، میلیشیایێن ب ناڤێ «کەتائب حزب الله» ل باژارێ کەرکووکێ 3 مال شەوتاندنە، یەک ژ وان مالان یا ئەندازیار «لوهەیب جاسم محمد ئەلعاکی» یە کو دکەڤە تاخا «تسعین»، مالا ددویان یا فرۆکەڤانێ خانەنشینکری لیوا «عەلی ئەلعانی» یە کو نها ل دەرڤەی ئیراقێ ژیان دکە، ناڤێ کەسێ سێێەمین ژی کو بەرپرسەکێ لەشکری یێ خانەنشینکری یە هەیا نها نەهاتیە زانین.
چەکدارێن سەر ب «کەتائب حزب الله» پشتی شەوتاندنا مالا ئەندازیار «لوهەیب» ل سەر دیوارێن مالا وی نڤیساندیە، سیخۆر، حزب الله.
ژ بەر کو ب سەدەما شەواتێ زرارێن هەری مەزن ب مالا ئەندازیار لوهەیب کەتنە، نەچار مایە مالا خوە خەراب بکە.
ئەندازیار لوهەیب ژ «دارکا مازی» رە راگهاند، پشتی کو وی لەکۆلین کری ژ بۆی دەرکەتنا سەدەمێن شەوتاندنا مالا وی ژ ئالیێ ڤان میلیشیایان ڤە، ئەڤ یەک ژ بۆی وی ئەشکەرە بوویە کو بریارەکە تایبەت ژ ئالیێ فەرمانداریا حەشدا شەعبی دەرکەتیە ژ بۆ شەوتاندنا مالا هەر کەسەکێ کو ل گەل حکوومەتا هەرێما کوردستانێ دا هەڤکاریێ دکە و فەرماندارێن بەرێ یێن رەژیما بەعس د ڤی باژاری دا.
تاخا «تسعین» یا باژارێ کەرکووکێ دکەڤە سەر رێیا کەرکووک – بەغدایێ، پرانیا ئاکنجیێن ڤی تاخی ژ ترکومان و عەرەبێن سونە پێک تێ.
ل گور ئاگاهیێن پێگەها «دارکا مازی»، ئەندازیار لوهەیب د یەک ژ شیرکەتێن گازێ دا ل هەرێما کوردستانێ کار دکە.
