کۆلبەرەکێ کورد ژ ئالیێ پاسدارێن ئیرانێ ڤە ھات کوشتن

 ل ناڤچەیا بانە یا رۆژھلاتێ کوردستانێ کۆلبەرەکێ کورد ژ ئالیێ پاسدارێن ئیرانێ ڤە ھات کوشتن.

رێخستنا مافێن مرۆڤان “ھنگاو” بەلاڤ کر، کۆلبەرەکێ کورد یێ ب ناڤێ «ھەژار فەرەجی» ل زۆزانێن سینۆری یێن نێزیکی باژارۆکێ بانە، ژ ئالیێ ھێزێن ئیرانی ڤە ھات کوشتن.

وێ رێخستنا مافێن مرۆڤان دیار کر، ھێزێن ئیرانی بێی کو ھەژار فەرەجی ئاگاھدار بکن، گولـلە لێ رەشاندنە.

ل گۆری ئامارێن ھنگاو، د ناڤا 5 مەھێن بۆری دا، ھەری کێم 6 کۆلبەرێن کورد ل ناڤچەیا بانە ژ ئالیێ ھێزێن ئیرانی ڤە ھاتنە کوشتن.

خەلکێ ناڤچەیێن سینۆری یێن رۆژھلاتێ کوردستانێ ژ بەر ھەژاریێ نەرچار دبن کارێ کۆلبەریێ د ناڤبەرا باشوور و رۆژھلاتێ کوردستانێ دا د ریێن دژوار را بکن، لێ گەلەک جاران ژی راستی ئێریشێن ھێزێن ئیرانێ تێن.