بریارە ئالیێن سیاسی یێن کوردستانێ ب سەرپەرشتیا سەرۆکێ هەرێما کوردستانێ و نوونەرا تایبەتا سەکرەتەرێ گشتییێ نەتەوێن یەکگرتی ل ئیراقێ بجڤن و بریارێ دەربارێ دەما هلبژارتنا پارلامەنتۆیا کوردستانێ دە بدن.
ب ئارمانجا دایینا بریارێ دەربارێ دەما هلبژارتنا پارلامەنتۆیا کوردستانێ دە، ئالیێن سیاسی یێن هەرێما کوردستانێ ئیرۆ چارشەمێ 10ێ تەباخێ ب سەرپەرشتیا سەرۆکێ هەرێما کوردستانێ، نێچیرڤان بارزانی و نوونەرا سەکرەتەرێ گشتی یێ نەتەوەیێن یەکگرتی ل ئیراقێ جینین هەننس-پلاسخارت، دجڤن.
نوونەرا سەکرەتەرێ گشتی یێ نەتەوەیێن یەکگرتی ل ئیراقێ جینین هەننس-پلاسخارت د جڤینێ دە ئامادە دبە و وێ پێشتر پێشنیار کربوو کو هلبژارتنێن هەرێما کوردستانێ د دەستپێکا مەها ئادارا بهێت دە بێن کرن.
د دەما بۆری دە، ئالیێن سیاسی یێن کوردستانێ چەند جاران ب نوونەرا سەکرەتەرێ گشتی یێ نەتەوەیێن یەکگرتی ل ئیراقێ رە دەربارێ یاسایا هلبژارتنێ و ئاکتیڤکرنا کۆمسیۆنێ و دیارکرنا دەما هلبژارتنان دە جڤیابوون، لێ نەگهیشتن چ لهەڤکرنەکێ.
سەرۆکێ هەرێما کوردستانێ نێچیرڤان بارزانی پێشتر د رۆژا 24/2/2022ان دە فەرمانا هەرێمی ژ بۆ دیارکرنا رۆژا هلبژارتنێن گشتی یێن پارلامەنتۆیا کوردستانێ ئیمزە کربوو و بریار بوو هلبژارتن رۆژا 1/10/2022ان بهاتا کرن، لێ ئالیێن سیاسی ل سەر یاسایا هلبژارتنێ و ئاکتیڤکرنا کۆمیسیۆنێ نە هەڤنێرین بوون، چەند جاران ژی ئالیێن سیاسی ژ بۆ وێ پرسێ جڤیابوون.
