هێزێن سوپایا پاسداران ل بلنداهیێن گادەرا ناڤچەیا شنۆ یا پارێزگەها ئورمیێ ل رۆژهلاتێ کوردستانێ، گوللـە بەردانە هەژمارەک وەلاتیێن سڤیلێن خەلکێ ناڤچەیا مەرگەڤەرا باژارێ ئورمیێ و د ئەنجامێ دە کەسەکی ژیانا خوە ژ دەست دا و 2 کەس ژی بریندار بوون.
ل گۆر زانیاریێن تۆرا مەدیایی یا رووداوێ، ئێڤارا رۆژا دوشەمبێ 8ێ تەباخێ ل ناڤچەیا سینۆری یا گادەرا ناڤچەیا شنۆیێ، هێزێن سوپایا پاسداران یا ئیرانێ تەقە ل 12 کەسێن سڤیلێن خەلکێ ناڤچەیا مەرگەڤەرا باژارێ ئورمیێ کرنە، کو ژ باشوورێ کوردستانێ ڤە ڤەدگەریان رۆژهلاتێ کوردستانێ.
د ئەنجاما گولبەردانا هێزێن ئیرانێ، کەسەکی ب ناڤێ محەمەد-ئەمین ئەحمەدی خەلکێ گوندێ لاجان یا مەرگەڤەرا ئورمیێ ژیانا خوە ژ دەست دایە.
هەروها دو وەلاتیێن دن یێن ب ناڤێ زرار ئەحمەدی و ئوزێر سابری ئازەر ژی کو هەردو خەلکێ گوندێ دزێ یێ مەرگەڤەرێ نە، بریندار بوونە.
چاڤکانیەکی خوەجهی ل رۆژهلاتێ کوردستانێ ژ رووداوێ رە دیار کر، هەژمارەک کەسێن دن ژی ژ ئالیێ هێزێن سوپایا پاسداران ڤە هاتنە دەستەسەرکرن.
دەربارێ بوویەرێ دە هێژ رایەدارێن ئیرانێ ت داخویانی بەلاڤ نەکرنە.
ل گۆر زانیاریێن کو چاڤکانیەکی خوەجهی دانە رووداوێ، ئەو کەس ژ باشوورێ کوردستانێ ڤەگەریانە رۆژهلاتێ کوردستانێ و ت کەلووپەل ب وان رە نەبوویە.
