ژ 93 کۆچبەرێن کو رۆژا چارشەمێ 11ێ تەباخا 2022یێ بەلەما وان ل نێزیکی گراڤەکا یوونانستانێ نۆقمی ئاڤێ بووی، تەنێ 29 کەس رزگار بوون و یێن دن وندا نە.
کۆمەلەیا پەنابەرێن ڤەگەریایی یێن ئەورۆپایێ راگھاند، پرانیا وان کۆچبەران کوردن و بەلەما کو تێ دا بوون، یا نێچیرا ماسیان بوویە و ژ شیانا خوە زێدەتر، کۆچبەر لێ سوار بوونە.
ل گۆر زانیاریان، هێژ ژی چارەنووسا ھەژمارەکا مەزنا وان کۆچبەرێن کو رۆژا چارشەما بۆری د ناڤبەرا ترکیا و یوونانستانێ دا بەلەما وان د دەریایێ دا نۆقمی ئاڤێ بووی، نە دیارە. کۆمەلەیا پەنابەرێن ڤەگەریایی یێن ئەورۆپایێ ئاشکەرا دکە، پرانیا وان کۆچبەران کوردن.
سەرۆکێ کۆمەلەیا پەنابەرێن ڤەگەریایی یێن ئەورۆپایێ بەکر عەلی ژ کوردستان24ێ را راگھاند: “بەلەما کو کۆچبەر لێ ھاتبوون بارکرن، بەلەما نێچیرا ماسیان بوویە. بەلەمەکا ب سلامەت نینە و زێدەتری شیانا خوە کۆچبەر لێ ھاتنە سوارکرن. ھەژمارا کۆچبەران 93 کەس بوویە، ل گۆر زانیاریێن مە ھەتا نھا تەنێ 29 کەس رزگار بوونە و ئەوێن دن چارەنووسا وان نە دیارە.”
ئەڤە د دەمەکێ دایە کو هێژ ژی گەلەک کۆچبەرێن کوردێن پار د دەریایا ئیجە دا و د کانالا ئینگلیزێ دا بەلەما وان نۆقمی ئاڤێ بووی، چارەنووسا وان نە دیارە. بەشەک ژ تەرمێن وان ھاتنە دیتن و ھاتنە ڤەگەراندن، لێ بەلێ 27 کەس نە ب زندی، نە ژی ب مری، ل سەر وان چ زانیاریەک تونەیە.
