پشتی 15 سالان ژ جودابوونێ هەردو پارتیێن دەمۆکرات دبن یەک
پشتی جودابوونا 15 سالان، پارتیا دەمۆکراتا کوردستانا ئیرانێ (HDK-I) و پارتیا دەمۆکراتا کوردستانێ (HDK) بریارا یەکگرتنێ دان. هەر دو ئالی ل سەر میکانیزما یەکگرتنێ و ئاوایێ کۆنگرەیا بێ ل هەڤ کرن. وەک نیشانەیا تەمامبوونا پرۆسەیا یەکگرتنێ، رۆژا 16ێ تەباخا 2022ێ، مەراسیما سالڤەگەرا دامەزراندنا پارتیا خوە ب هەڤ رە کرن.
پشتی سالەک ژ گوفتووگۆیان، هەردو پارتیێن دەمۆکرات (HDK-I) و (HDK) گهیشتن رێکكەفتنێ کو ب هەڤ رە کار بکن و ببن یەک.
محەمەد نەزیف قادری د دانوستاندنان دە بەرپرسێ شاندا (HDK-I) بوو، ژ بۆ راکرنا ئاستەنگیێن ب (HDK) رە و دانینا مەکانیزمەیەکە گونجاو ژ بۆ یەکگرتنێ. قادری ژ ک24ێ رە گۆت: «ئەوێن کو دخوازن تەڤگەرا کوردی ب گشتی و ب تایبەتی ل رۆژهلاتێ کوردستانێ ب سەر بکەڤە، رۆژ دژمارتن تا پێڤاژۆیا یەکگرتنێ بەر ب سەرکەفتنێ ڤە بچە».
گۆت ژی: «یەکگرتنا پارتیا دەمۆکرات، باوەری و هێڤیەکە زێدەتر ددە خەلکێ ژ بۆ رووبرووبوونا رێژیما کۆمارا ئیسلامی یا ئیرانێ و د هەمان دەمێ دە هێڤی ددە پارتی و ئالیێن دن یێن رۆژهلاتێ کوردستانێ».
پارتیا دەمۆکراتا کوردستانێ رۆژا 16ێ تەباخا 1945ێ ل باژارێ مەهابادا رۆژهلاتا کوردستانێ هات دامەزراندن، دامەزرێنەرێ وێ ژی پێشەوا قازی محەمەد بوو کو کۆمارا کوردستانێ ل مەهابادێ ژی دامەزراند. پشتی کۆنگرەیا 13مین، ژ بۆ جارا سێیەمین جودابوون د وێ پارتیێ دە روو دا و ئەڤ هەردو پارتی 15 سالن ب دو ناڤێن جودا کارێن خوە دکرن.
بەرپرسێ شاندا (HDK) بۆ دانووستاندنا لگەل (HDK-I) کەمال کەریمی ژ ک24ێ رە گۆت: «مە ل سەر وێ ل هەڤ کریە کو د قۆناخا یەکەم دە هەتا گرێدانا کۆنگرەیێ، مە ئەنجوومەنەکە 12 کەسی دەستنیشان کریە، ژ بۆ ب هەڤبەشی کار بکن. ل گۆری وێ میکانیزمێ، مە مستەفا هجری وەک بەرپرسێ وێ ئەنجوومەنێ دەستنیشان کریە، خالد عەزیز ژی وەک بەردەڤکێ پارتیێ».
ل گۆر رێكکەفتنێ، ژ نها و پێ ڤە ئەو پارتی دێ ب لۆگۆیا پارتیا دەمۆکراتا کوردستانێ چالاکیێن خوە بکە و وەک ئارمانجەکە سیاسی ژی، داخوازا ئیرانەکە فەدەرال دکن. وەکی کو ئەو دبێژن، یەکگرتنا وان دێ بێتر ئەنەرژیێ بدە ئەندام و ئالیگرێن وان، ژ بۆ رێبازا کو ئەڤ 77 سالن بەردەوامە باژۆن.
