عەسائب ئەهلولحەق 102 دۆنه‌م ل سه‌ر رێیا «کەرکووک – هه‌ولێرێ» گرتن
نڤێسینگەها ئابۆری یا میلیشیایێن حەشدا شەعبی یێن ب ناڤێ ” عەسائب ئەهلولحەق” ل باژارێ کەرکووکێ دخوازن پارچە ئەردەکێ ستراتەژیک کو دکەڤە سەر رێیا کەرکووک-هەولێرێ ل سەر ناڤێ خوە تاپۆ بکن.
ل گۆر ئاگاهیێن تایبەت یێن پێگەها «دارکا مازی»، نڤێسینگەها ئابۆری یا میلیشیایێن ” عەسائب ئەهلولحەق” ل پارێزگەها کەرکووکێ، خەباتێن جددی دکن ژ بۆی ڤێ یەکێ کو پارچە ئەردێ ژمارە 3/2 ل کەرتێ 40 ب دەست خوە بخن و ل سەر ناڤێ خوە تاپۆ بکن.
ل گۆر ئاگاهیێن تایبەت یێن «دارکا مازی»، محەمەد مەولەوی یێ بەرنیاس ب ئەبو سەجاد، ئالیکارێ یەکێ یێ برێڤەبەرێ نڤیسینگەها ئابۆری یا عەسائب ئەهلولحەق ل پارێزگەها کەرکووکێ، ل رۆژا 16/7/2022ێ پێوەندی ب تارق شەعبان ئیبراهیم، برێڤەبەرێ نڤیسینگەها عەسائب ئەهلولحەق ل پردێ کریە ژ بۆی برێڤەبرنا ڤێ مامەلەیێ ل رێڤەبەریێن بەرپرس ژ ڤی کاری ل پردێ.
هەر وها ل گۆر ئاگاهیێن تایبەت یێن پێگەها «دارکا مازی»، رێڤەبەریا چاندنیێ و تاپۆیا خانۆبەرا ل پردێ، رازیبوونا خوە ل سەر ڤێ یەکێ دیار کریە، ژ بۆی ڤێ یەکێ ژی تاپۆیەکا نوو یا ڤی ئەردی ل 18/7/2022ێ دایە دەست نوونەرێ میلیشیایێن عەسائب ئەهلولحەق.
هەیا نها هیچ کەسەک نزانە ئەڤ پەرچە ئەرد کو ژ 102 دۆنەمان پێک تێ دێ ژ بۆی چ مەبەست ژ ئالیێ ڤێ هێزا حەشدا شەعبی ڤە هێتە بکارئانین.
