ئارتێشا ئیراقێ و ھێزێن پێشمەرگە ژ بۆ دەرخستنا تەرۆریستێن داعشێ ل ناڤچەیێن سینۆری یێن د ناڤبەرا گەرمیان و دیالایا دا ئۆپەراسیۆنەکا لەشکەری یا ھەڤبەش ب ناڤێ “ئیرادەیا پۆلا” دەست پێ کرن.
وەزارەتا پێشمەرگە ئیرۆ رۆژا پێنجشەمێ 18/8/2022یێ د داخویانیەکێ دا راگھاند، کو ھەڤکاری و ھەڤاھەنگیا بەردەوام د ناڤبەرا ھەموو یەکینە و پێکھاتەیێن ئەولەھیێ دا، ئەنجامێن ئەرێنی د شۆپاندنا تەرۆریستێن داعشێ دا نیشان دایە.
د داخویانیێ دا ھاتیە راگھاندن: “ئەو ئۆپەراسیۆن ب سەرپەرەشتیا فەرماندەیا ئۆپەراسیۆنێن ھەڤبەش و ل سەر بنگەھا زانیاریێن ئستخباراتی ھاتنە کرن و د جڤینێن ناڤبەرا ھێزێن فەدەرال و ھێزێن پێشمەرگە دا ب ئاوایەکێ بەرفرەھ بەحسا وان ھاتیە کرن.”
د بەردەوامیێ ژی دا ھاتیە گۆتن: “یەکینەیێن لەشکەری یێن فەرماندەیا ئۆپەراسیۆنێن دیالا، فەرماندەھیا فەرماندەیا ئۆپەراسیۆنێن دووزخورماتوو و فەرماندەیا میحوەرێ یەکەم، دویەم و سێیەمێن ھێزێن پێشمەرگە ب پشتەڤانیا فرۆکەیێن شەرێن ھێزێن ئاسمانی د ڤێ ئۆپەراسیۆنێ دا بەشدارن.”
د بەشا داوی یا داخویانیێ ژی دا ھات گۆتن: “ئۆپەراسیۆن ئارمانج دکە کو ل ھەرێما ئۆپەراسیۆنێن ھەڤپارێن د ناڤبەرا یەکینەیێن لەشکەری یێن فەدەرال و کوردستانێ یێن د ناڤ سینۆرێن ھەرێما فەرمانداریا دیالە و ناڤەندا ئۆپەراسیۆنا دووزخورماتویێ دا لێگەرین و لێگەرینا ل ھەموو گوند و دەشتێن د ناڤبەرا ھەر دو سینۆران دا ل ھەرێمێن بەرژەوەندیێن ھەڤپار. ب دەرخستنا بەرماھیێن تەرۆریست و کەسێن لێگەرینکری، زوھاکرنا چاڤکانیێن تەرۆرێ، دابینکرنا ئەولەھیێ و پاراستنا ئارامیێ ل ھەرێمێ تێ ناسکرن.”
