ھاتە ھینبوون کو کەسێ دوھی ل دھۆکێ د نیڤا رێ دا ھاتیە کوشتن کەسەک بوویە کو پێش نها ژ ناڤا پەکەکێ دەرکەتیە. ھەروھا ژێدەران دا زانین کو ئەڤ کەس ژ ئالیێ پەکەکێ ڤە ھاتیە تەھدیدکرن.
محەمەد عەلائەدین نوورەدین دوھی ل ناڤەندا باژارێ دھۆکێ دەما ژ تەکسیێ دادکەت، ب 3 گولـلەیان ھات کوشتن. چاڤکانیێن ئەولەھیێ دەربارێ تاوانا کو روودای دا ھندەک زانیاری پارڤە کرن.
محەمەد عەلائەدین نوورەدینێ ژ باکورێ کوردستانێ بەریا دەمەکێ ژ پەکەکێ دەرکەتبوو و ل سلێمانیێ دەست ب ژیانا خوە کربوو. لێ پشترا ژ ئالیێ پەکەکێ ڤە گەف ل وی هاتن کرن و ژ بەر ڤێ یەکێ بریار دا کو باژارێ کو لێ دژیا بگوھەریت. ئەو ژ بۆ وەرگرتنا مولەتا نیشتەجێبوونێ (ئیقامێ) چووبوو دوھۆکێ.
ھاتە ھینبوون کو نوورەدینێ 39 سالی د سەرەدانا خوەیا ژ بۆ وەرگرتنا مولەتا نیشتەجیبوونێ دا دیار کریە کو ئەو د تەمەنەکێ بچووک دا ژ ئالیێ پەکەکێ ڤە هاتیە رەڤاندن و پشترا ئەو بریە چیا، ئەو ژ پەکەکێ ڤەقەتیایە و ھاتیە ھەرێما کوردستانێ.
ھاتە ھینبوون کو قوربانی ل بازارێ دوھۆکێ ل تاکسیەکێ سووار بوویە، تاوانبارێ کوشتنێ ب ئۆتۆمۆبیلەکا دن ل پەی وی ھاتیە و ل نێزیکی یاریگەها برا یا تاخێ مالتایێ 3 گولـلە بەردانە و د ئەنجامێ دا نوورەدین ھاتیە کوشتن.
ھات دیارکرن کو محەمەد عەلائەدین نوورەدینێ 39 سالی ژ باکورێ کوردستانێیە.
د دیمەنێن کامیرەیا ئەولەھیێ دا روویێ تاوانبارێ کوشتنێ ب زەلالی دهێت دیتن. پشتی کوشتنا نوورەدین، تاوانبار درەڤیت و شۆپا وی وندا دبیت.
رایەدارێن ئاساییشێ دیار کرن کو ھەموو رێیێن دەرکەتنا باژێری ھاتنە گرتن و تاوانباری شەنسێ رەڤێ نینە و گۆتن، “وەکە دیار، تاوانبار نە خەلکێ ھەرێما کوردستانێ بە.”
چاڤ ل سەر پەکەکێ نە
تەڤگەرا پەکەکێ کادرۆیێن بەرێ یێن کو ژ وێ ڤەقەتیای ب خایین رادگەهینیت و هەرتم وان عاجز دکە. دەما کو پەکەکە ھنەک کادرۆیێن خوەیێن بەرێ دکوژە، مالباتێن وان تەھدید دکە و ب چ ئاوا رێ ب وان نادە ژ بۆ چاپەمەنیێ راستیان بێژن. هەتا نها گەلەک کەس، ب تایبەتی ژی کەسێن کو ب ئەشکەرەیی پەکەکە رەخنە کرین، ژ ئالیێ پەکەکێ ڤە ھاتنە کوشتن. د ناڤا کەسێن ھاتنە کوشتن دا کەسێن پایەبلندێن مینا کانی یلماز (فەیسال دونلاج) ژی ھەبوون کو تەڤلی قۆناغا دامەزراندنا پەککەێ ژی بوونە. د 7ێ تەباخا 2014ێ دا شۆرەش بالچێ کو ب مالباتی خوە ڤە تەڤلی ناڤا پەکەکێ بووبوو و پشترا ژ پەکەکێ قوت بووبوو، لگەل کەچا خوە یا ب ناڤێ رەوشەن کو 3 سالی بوو ژ ئالیێ پەکەکێ ڤە ھاتن کوشتن.
