پارتیا كاركه‌را و بۆمبه‌یا نووكله‌رێ یا كو ل چیایێ مه‌تینایێ هاتیه ته‌قاندن!!
پارتیا كاركه‌را ئیرۆ ل مه‌دیایا خوه هنه‌ك دیمه‌ن پارڤه‌كرنه و گۆتیه: «تركیێ بۆمبه‌یا نووكله‌رێ یا تاكتیكی ل چیایێ مه‌تینایێ ته‌قاند»، گه‌ریلا ژی كارینه دیمه‌نێن ته‌قینا ڤێ بۆمبه‌یا وێرانكه‌ر ژ مه‌سافه‌یه‌كه كێم بگرن و تو تشته‌ك ل وان نه‌هات!.
رێخستنا په‌كه‌كێ، ئیرۆ رۆژا چارشه‌می 24/8/2022ێ د مه‌دیایا خوه یا فه‌رمی ده، هنه‌ك دیمه‌نێن ڤیدیۆ و فۆتۆ پارڤه‌كرنه و ل سه‌ر نڤیساندییه كو ئارتێشا ده‌وله‌تا ترك، ل «گرێ هه‌كاریێ یێ هه‌رێما مه‌تینایێ» بۆمبه‌یا نووكله‌رێ یا تاكتیكی ل دژی هێزێن مه بكارئانیه.
په‌كه‌كێ هه‌ر وها نڤیساندیه، ده‌وله‌تا ترك ژ بۆ كو تۆنه‌لێن شه‌ر برووخینه، ژ بۆ كو شکەفت و نوقتەیێن دەرباسبوونێ یێن ل قادێن بجهبوونێ یێن گەریلایێن مه ئیمحا بكه، نه‌چار مایه بۆمبه‌یا نووكله‌رێ یا تاكتیكی ب کار بینه.
بۆمبه‌یا نووكله‌رێ یا تاكتیكی چی یه؟
ب چه‌كێ نووكله‌رێ یێ تاکتیکی یان ژی چەکێ ناڤۆکی یێ نەستراتەژیک تێ ناس كرن، هه‌ر وها بۆمبه‌یه‌كه ژ رێزه بۆمبه‌یێن نووكله‌رێ تێ حه‌ساب كرن، بۆ ئارمانجێن ستراته‌جیك تێن ب كارئانین و ئه‌ڤ بۆمب همبه‌ری ده‌هان تۆنێن TNT یێ یه، هه‌ر وها تیژكێن وێ ب كیلۆمه‌تران دوور دچن و ب ده‌هان سالان دناڤا ئاخ و ئاڤێ ده دمینن و هه‌ر تشتی وێران دكن، لێ به‌لێ تشتا عه‌جێب ئه‌ڤه، ب یا په‌كه‌كێ، تركیێ ئیرۆ ئه‌ڤ بۆمب ل گرێ هه‌كاریێ بكارئانیه، د هه‌مان ده‌مێ ده په‌كه‌كێ دیمه‌نێن ته‌قاندنا وێ بۆمبه‌یا وێرانكه‌ر ژ مه‌سافه‌یه‌كا كێم گرتنه!!
هێژای گۆتنێ یه، ل گۆری پێگه‌ها ساینتفێك ئامه‌ریكان، چەكێ نووكله‌رێ یێ تاکتیکی، د جیهانا چەکان دە، ته‌قینه‌كه وێرانكه‌ر كو دگه‌هه 50 مێگاتونان چێدكه كو هه‌ر تشتی ل هاوردۆرا خوه وێران دكه، تیژكێن وێ ب ده‌هان سالان ل هه‌رێما لێ تێ ته‌قاندن د ناڤا ئاڤ و ئاخێ ده دمینن، ئه‌ڤ چه‌ك دكاره باژێره‌كی یان هنه‌ك هه‌رێمێن باژێر ب چه‌ند چركه‌یان ب ته‌مامه‌تی وێران و كاڤل بكه.
بۆ نموونە، بۆمبەیا B-61 یا ئامەریکی دکارە ژ 0،3 هەتا 50 مێگاتونان ئەنەرژیا تەقینێ بەردە، بۆمبەیا هیرۆشیما هێزا وێ یا وێرانکەرا تەخمینکری 15 مێگاتونان بەردابوون.
گه‌لۆ پرسا ل ڤر ئه‌ڤه، چاوا دبه كو بۆمبه‌یا نووكله‌رێ یا تاكتیكی وه‌ره ته‌قاندن و ب مه‌سافه‌یه‌كه كێم په‌كه‌كه ب كامیرایێن خوه دیمه‌نان بگره؟!
ئه‌م ناخوازن ل ڤر ئێریشێن ده‌وله‌تا ترك یا داگیركه‌ر ل سه‌ر خاكا كوردستانێ مه‌شرووع بدن خوه‌یاكرن، لێ به‌لێ په‌كه‌كه ب ڤان ده‌ره‌وان دخوازه هه‌بوون و به‌رخوه‌دانا خوه یا ساخته ل باشوورێ كوردستانێ مه‌شرووع بكه.
