سەرۆکوەزیرێ هەرێما کوردستانێ مەسروور بارزانی ئیرۆ 25ێ تەباخا 2022ێ پەیامەک ب بۆنەیا 34ەمین حەملەیا ئەنفالا بادینان بەلاڤ کر و تێ دە راگهاند، «دڤێ زیهنیەتا ل پشت ڤان کارەسات و تاوانان ب داوی ببە و رێ ل بەر دوبارەبوونا کۆمکوژیێن ب ڤی رەنگی وەرە گرتن».
پەیاما سەرۆکوەزیر مەسروور بارزانی:
ب بۆنەیا حەملەیا ئەنفالا بادینانێ کو قۆناخا داوی یا ئەنفالا بوو، رەژیما ئیراقێ وەکە هەموو ناڤچەیێن دن یێن کوردستانێ، تاوانەکە دن یا هۆڤانە ل هەمبەر خەلکێ دەڤەرا بادینان کر کو د ئەنجاما وێ حەملەیا کو چەکێ قەدەخەکری هات بکارئانین دە، ب هەزاران کەس هاتن شەهید و وەنداکرن و ب دەهـ هەزاران کەس ژی کۆچبەر و دەربدەر بوونە و ب سەدان گوند وێران بوون.
د سی و چارەمین سالڤەگەرا ڤێ تاوانا هۆڤانە دە، ئەم ب رێز و حورمەت قوربانیێن ئەنفالێ ل بادینان ب بیر تینن و ئەم جارەکە دن دوبارە دکن کو دڤێ حكوومه‌تا ئیراقێ ل گۆری دەستوورێ، زیاندیتییان و مالباتێن قوربانیێن ئەنفال و تاوانێن رەژیما بەرێ یا ئیراقێ، ب ئاوایەکی هێژا قەرەبوو بکە کو ئەڤ مافەکی رەوا یێ گەلێ ستەملێکری یێ کوردستانێ یە. هەروه‌ها دڤێ زیهنیەتا ل پشت ڤان کارەسات و تاوانان ب داوی ببە و رێ ل بەر دوبارەبوونا کۆمکوژیێن ب ڤی رەنگی وەرە گرتن.
د سالڤەگەرا ئەنفالا بادینانێ دە، سلاڤ و رێز ل گیانێ پاکێ ئەنفالکریێن بادینانێ و تەڤاهیا شەهیدێن کوردستانێ.
