ل کەرکووکێ د ناڤبەرا جۆتکارێن کورد و عەرەب دا شەر روودا

 ل گوندێ چەخماخێ یێ ل رۆژھلاتێ کەرکووکێ دوھ ئێڤارێ ھەژمارەک جۆتکارێن عەرەب ئاڤێتن سەر جۆتکارێن کورد و د ناڤبەرا ھەر دو ئالیان دا شەر و پەڤچوون دەرکەت.

موختارێ گوند کوێخا عومەر شاسوار راگھاند: “ئەو عەرەب ھاتنە سەر گوندێ مە و داگیر کرینە، پشتی 16ێ ئۆکتۆبەرێ ڤە، 300 دۆنم ئەردێن جۆتکارێن کورد داگیر کرینە و ھاتنا وان ژی ب ئارمانجا سڤکاتیکرن و ترساندنا وەلاتیێن کوردێن ل گوند بوو.”

کوێخا عومەر شاسوار ئەشکەرە کر کو د ئەنجامێ دا شەر و پەڤچوون د ناڤبەرا ھەر دو ئالیان دا قەومیە و ل ھەر دو ئالیان بریندار ھەنە.

شاسوار دیار کر: “د شەری دا چەک نەھاتیە بکارئانین و تەنێ ب داران بوویە. ئەو عەرەب پشتەڤانیا وان ژ ئیدارەیا کەرکووکێ ھەیە و دەستھلاتدارن و ب ئاوایەکێ بەردەوام زەختێ ل مە دکن، دا کو ب یەکجاری گوند ڤالا بکن.”

موختارێ گوندێ چەخماخێ ئەشکەرە دکە، ژ 150 مالێن ل گوند، پشتی 16ێ ئۆکتۆبەرێ و ڤەکشینا ھێزێن پێشمەرگە، ژ بەر نەباشبوونا رەوشا ئەولەھیێ، تەنێ 7 مال مانە و بەرەڤانیا گوند و ناسنامەیا خوە دکن.

کوێخا عومەر شاسوار داخواز دکە کو سەرکرداتیا کورد و نوونەرێن کوردان ھەولێن جدی بدن و بەرەڤانیا وان بکن، دا کو گوند ب یەکجاری نەیێ ڤالاکرن.