ل بانە کۆلبەرەکێ دن ژ ئالیێ ھێزێن ئیرانێ ڤە ھات کوشتن

ل ناڤچەیا بانە یا رۆژھلاتێ کوردستانێ کۆلبەرەکێ کورد ژ ئالیێ ھێزێن ئیرانێ ڤە ھات کوشتن.

رێخستنا مافێن مرۆڤان یا “ھەنگاو” بەلاڤ کریە، دوھ ئینێ 26ێ تەباخا 2022یێ کۆلبەرەکێ کورد یێ ب ناڤێ رێبوار رەشیدی ب تەقەیا راستەراستا ھێزێن ئیرانی ھات کوشتن.

ھەروھا راگھاندیە، رێبوار رەشیدی تەمەن 30 سالی و خەلکێ گوندێ قولیاوا یێ سەر ب باژارێ بانەیە و بابێ دو زارۆکان و ھەڤژینا وی ژی دوجانی یە.

ل گۆری ئامارێن ھەنگاو، د ناڤا 35 رۆژێن بۆری دا، ھەری کێم 5 کۆلبەرێن کورد ل ناڤچەیا بانێ ژ ئالیێ ھێزێن ئیرانی ڤە ھاتنە کوشتن.

خەلکێ ناڤچەیێن سینۆری یێن رۆژھلاتێ کوردستانێ ژ بەر ھەژاریێ، نەچار دبن کو کارێ کۆلبەریێ د ناڤبەرا باشوور و رۆژھلاتێ کوردستانێ دا د رێیێن دژوار را بکن، لێ گەلەک جاران ژی راستی ئێریشێن ھێزێن ئیرانێ تێن.