پلانەکا ئێریشکرنا ل سەر کێلگەھا گازێ یا کۆرمۆرێ، ژ ئالیێ ھێزا پێشمەرگە ڤە ھات پووچکرن.
فەرمانداریا ھێزێن کۆماندۆ د داخویانیەکێ دا ئاشکەرا کر، فەوجا 4 یا ھێزێن کۆماندۆ ئیرۆ 28ێ تەباخا 2022یێ ل نێزیکی گوندێ زەمبۆرێ یێ سەر ب گەرمیانێ ڤە، دەست دانا سەر 3 سەکۆیێن مووشەکێن کاتیووشا کو ژ بۆ ئارمانجکرنا کێلگەھا گازێ یا کۆرمۆرێ ھاتبوون ئامادەکرن.
رۆژا 25ێ خزیرانێ ژی ب مووشەکان ئێریش ل سەر کێلگەھا گازێ یا کۆرمۆرێ ھاتبوو کرن و پشترا جیگرێ سەرۆکوەزیرێ ھەرێما کوردستانێ قوباد تالەبانی، وەزیرێ سامانێن سرووشتی کەمال محەمەد، وەزیرێ پێشمەرگە شۆرەش ئیسماعیل و ھەژمارەک ژ بەرپرسێن دنێن حکوومەتا ھەرێمێ سەردانا وێ کێلگەھێ کرن و بریار دا، ھێزێن ئەولەھیێ یێن زێدەتر ل دەردۆرا کێلگەھێ بێن بجھکرن.
کێلگەھا گازێ یا کۆرمۆرێ کو د سالا 2007ێ دا ھاتیە دامەزراندن، دکەڤە سینۆرێ ناحیا قادر کەرەم یا سەر ب ناڤچەیا چەمچەمالا سلێمانیێ. کۆمپانیێن دانا گاز و ھیلالا ئیماراتی وەبەرھێنانێ تێ دا دکن.
