سەرفەرمانداریا وەزارەتا پێشمەرگە، پرۆباگندایێن مەدیایێن پهكهكێ دەربارێ وێ یەکێ کو هێزێن پێشمەرگە ل چیایێن ئامێدی و زاپێ ژ ئارتێشا ترکیێ رە رێ خوەش کرنە، رەد کر و گۆت: «چ بنگەهەکە وان پرۆباگندایان نینە». سەرفەرمانداریا پێشمەگرە هەروهها راگهاند، «پهكهكه نکارە شەرێ ترکیێ بکە و بەردەوام ناڤچەیێن سینۆری یێن هەرێما کوردستانێ ژ هێزێن ترکیێ را ڤالا دکە».
سەرفەرمانداریا وەزارەتا پێشمەرگە دوهـ یەکشەمبێ 28ێ تەباخا 2022ێ دەربارێ هن پرۆباگندایێن د مەدیایێن پهكهكێ دا داخویانیەک نڤیسکی بەلاڤ کر و ئەو پرۆباگندا رەد کرن.
د داخویانیێ دا تێ گۆتن، «مەدیایێن پهكهكێ ژ دوور ڤە وێنەیێن چەند ئۆتۆمۆبیلێن هێزا پێشمەرگە یا کوردستانێ بەلاڤ کرنە و ئیدیعا دکن کو هێزا پێشمەرگە یا کوردستانێ ژ هێزێن ترکیێ را رێ خوەش کرنە، تەڤی کو ئەم تەکەز دکن چ بنگەهەکە وێ ئیدیعایێ تونەیە، ئەم هەروهها رادگهینن کو مافێ هێزا پێشمەرگە یا کوردستانێ یە ل سەر ئاخا خوە دەستهلات و ئەرکێن خوە جیبجی بکەت و ئاخ و خەلکێ کوردستانێ بپارێزیت، لێ پرس ئەڤە، هێزێن پهكهكێ ب چ حەقەکێ ل سەر ئاخا هەرێما کوردستانێ نە و دەستێ هێزێن ترکیێ ژی ل پەی خوە رادکشینن (ناڤ ئاخا هەرێما کوردستانێ)؟ چما ناچن هوندرێ ترکیێ و چما گەف و سەرئێشیان بۆ خەلکێ کوردستانێ چێ دکن؟».
سەرفەرمانداریا پێشمەرگە هەروهها ئاماژە ب وێ یەکێ کریە کو ههرێما کوردستانێ ستاتۆیەکێ دەستووری و سیاسی، و بەرهەما خەبات و قوربانیدانا گەلێ کوردستانێ یە و دیار کریە، «ژ دەما هەرێما کوردستانێ هاتیە دامەزراندن، پهكهكه هەر دەم چاڤکانیا گەف و سەرئێشیان بوویە بۆ خەلکێ هەرێما کوردستانێ و ب نەحەقی رێگر بوویە ل بەر ئاڤەدانکرنا ب سەدان گوندان».
د داخویانیێ دا هەروهها ئاماژە ب گوهەرتنا ناڤێن چیا و ناڤچەیێن کوردستانێ ژ ئالیێ پهكهكێ ڤە کریە و دبێژە، «پهكهكێ رێ دایە خوە ناڤ و ناڤنیشانێن ناڤچە، چیا و دۆلێن هەرێما کوردستانێ بگوهەریت و ناڤێن سەیر و عەجێب و نەناسکری بۆ وان ناڤچەیان دانیت».
سەرفەرمانداریا پێشمەرگە یا سەر ب وەزارەتا پێشمەرگە دایە خویاکرن کو ژ بەر پهكهكێ گەلەک ژ خەلکێن ناڤچەیێن سینۆری گوندێن خوە ڤالا کرنە و دەست ژ مال و ملکێن خوە بەردانە، ل سەر وێ یەکێ د داخویانیێ دا وهها هاتیە گۆتن، «د کریارەکە نەمرۆڤی و دژی ژینگەهێ دا چەکدارێن پهكهكێ ل سەر رێ، دۆل، کانی و دارستانێن خوەزایی یێن هەرێما کوردستانێ مین داناینه کو مەترسیەکە مەزن بۆ سەر خەلکێن ئاسایی، کاسبکار و گوندیان چێکریە، هەر ژ بەر هەبوونا نەیاسایی یا پهكهكێ ل سەر ئاخا هەرێما کوردستانێ، بەشەکێ زێدە یێ خەلکێن ناڤچەیێن سینۆری مال و ملکێن خوە د جهـ دا هشتنە و تەرکاندنە».