هەستیێن هاکان ئه‌رسه‌لانێ کو د دەما قەدەغەیا دەرکەتنا دەرڤە یا كو ل 2 کانوونا 2015 ل سوورا ئامەدێ هاتیه راگهاندن د پەڤچوونان دا ژیانا خوە ژ دەست دابوو، پشتی 7 سالان د تەلیسەکی دا رادەستی بابێ وی کرن.
ل مژدارا 2021 هه‌ستیێن هاكان ئه‌رسه‌لان كو پاش 5 سالان ژ مرنا وی هاتبوون دیتن، ژ سازیا نۆشداریا داد یا ستەنبۆلێ بۆ نۆشداریا داد یا ئامەدێ هاتن هنارتن.
ئیرۆ ژی ل سەر ئاگاهدارکرنێ بابێ هاکان ئه‌رسه‌لان، عه‌لی رزا ئه‌سلان كو ژ ئەرزەرۆمێ یه هات ئامەدێ و چوو نۆشداریا داد یا ئامەدێ ژ بۆی وه‌رگرتنا هه‌ستیێن كوڕێ خوه.
هەستیێن هاکان ئاسلان د تەلیسی دا رادەستی بابێ وی هاتن کرن، عه‌لی رزا ئه‌سلان پشتی کو هەستیێن کورێ خوە وەرگرت، ژ بۆ دەفنکرنێ بەر ب ئەرزەرۆمێ ڤە ب رێ کەت.
