رێڤەبەرێ ئەولەکاریا دێرکێ حەسەن کۆرکماز، ژ بەر بوویەرا ترافیکێ یا 20ێ تەباخێ کو تێدا 21 کەسان جانێ خوە ژدەست دابوون، ژ کار ھات دوورخستن.
ل ناڤچەیا دێرکێ یا سەر ب پارێزگەھا مێردینێ یا باکورێ کوردستانێ، 20ێ تەباخا 2022یێ د بوویەرەکا ترافیکێ دا، دو بارھلگرێن کو تێ گۆتن تەگەرەیێن وان تەقیا بوون، کەتن ناڤ قەلەبالغیا خەلکێ و د ئەنجامێ دا 21 کەسان جانێ خوە ژ دەست دان و 26 کەس ژی بریندار بوون.
ژ بەر کو پشتی بوویەرا یەکەم کو تێدا دو کەسان جانێ خوە ژ دەست دابوون، پۆلیسان تەدبیرێن ئەولەھیێ وەرنەگرتنە و ژ بەر وێ بوویەرا دویەم قەومییە و ھەژمارا کەسێن مری زێدە بوویە رێڤەبەرێ ئەولەکاریا دێرکێ حەسەن کۆرکماز ژ کار ھات دوورخستن.
ھات زانین پێشتر ناڤەندا ھەڤاھەنگیا ڤەگوھاستنێ (ئوکەمۆ) دەربارێ رێ دا ھشیاری دایە رێڤەبەرێ ئەولەکاریا دێرکێ و قەیمەقامتیا دێرکێ داکو بارھلگر د وێ رێیێ را دەرباس نەبن، ل ھەر دو سازیان ژی بەرسڤا داخواز و ھشیاریا ئوکەمۆیێ نەدانە.
