سازیێن سڤیلێن ل باژارێن باکورێ کوردستانێ، پەیامێن خوەیێن رۆژا ئاشتیا جیھانی ل دیاربەکرێ راگھاندن. د داخویانیا ھەڤپار یا سازیێن سڤیل دا، بال ھات کشاندن کو شەر و پەڤچوون ھەر تێکچوویین، قەیرانێن جڤاکی، مرن و ئێشان پەیدا دکە. لۆما ژی دەستپێکرنا ب رێبازێن ئاشتیانە لێگەرینا ئاشیتیێ مسۆگەرە.
ل دیاربەکرێ نێزیکی 500 سازیێن سڤیلیێن ل 23 باژێرێن باکوورێ کوردستانێ ب داخویانیەکا ھەڤپار رۆژا ئاشتیا جیھانی پیرۆز کرن. د داخویانیێ دا بال ھات کشاندن کو جۆگرافیا کوردستانێ ھەر وەک قادا شەر بوویە و لۆما ژی دەنگێ ئاشتییێ یێ کو ژ ڤێ جوگرافیێ بلند دبە واتەدارترە.
پارلامەنتەرێ ھەدەپێ ئیمام تاشچەر دیار کر: “داخوازا مە ژ تەماما گەلێ جیھانێ ئەڤە کو سەد سالە ل سەر ئاخا کوردستانێ شەر ھەیە و ئاشتیەک پێک نایێ. چاوا کو ئەم ژ بۆ وەلات و گەلان ئاشتی دخوازن، تەنێ ب داخوازا مە نابە و ب ئاوایەکی بلا بکەڤن ناڤبەرا ڤی شەری و بدن راوەستاندن. و بلا کورد ژی وەکە ملەتێن دن یێن ل دنیایێ، ل سەر ئاخا خوە، ب ئارامی، ئازادی و سەربخوە بژین.
سەرۆکێ ژوورا پشەسازی و بازرگانیا دیاربەکرێ دا زانین کو پشتی ئەو قاس شەر و ئالۆزیان سەردەمەکێ کو پێوستی ب ئاشتی و ئارامیێ ھەیە مسۆگەر بوویە و دڤێ ترکیا ژی ئێدی ڤێ راستیێ ببینە و ل گۆر ڤێ راستیێ ژی گاڤێن ئاشتیانە سازوومان بکە.
سەرۆکێ ژوورا پیشەسازی و بازرگانیا دیاربەکرێ مەھمەت کایا دەستنیشان کر: “ژ 23 باژاران، نێزیکی 500 سازیێن سڤیل ئیرۆ پێکڤە پەیامەکی بەلاڤ کرن. دەستپێکرنا ئاشتیێ ل ترکیێ، ھەم پشەیا کارسازی، ھەم جڤاکێ، ھەم ژی وەلاتێن ل ھەرێمێ و دەردۆر ھەرکەسی ئەلەقەدار دکە. یانی ئێدی دڤێت پشتی ئەو قاس شەر و ئالۆزیان، ل وەلاتێ مە خەباتێن ئاشتیانە دەست پێ بکن. ئەڤ ژی نە ب پەڤچوونان، لێ ب بەشداریا ھەموو ئالیێن جڤاکی دڤێ ئەم سازوومان بکن.”
رێڤەبرێن سازیێن سڤیل بال کشاندن کو سەردەمێن دان و ستاندن تێن کرن و پێڤاژۆیێن ئاشتیێ تێن مەشاندن دا، ل گەل کو جڤاک کێمترین زرار دبینە، گەشەپێدان و پێکڤەژیان ژی زێدەتر بپێش دکەڤە. لۆما ژی بانگ و داخوازا دەملدەست راوەستاندنا پەڤچوونان و دەستپێ کرنا دان و ستەندنێن ئاشتیانە ھات کرن.
