رایەدارێن هەرێما کوردستانێ و ئیرانێ د جڤینێن هەری داوی یێن ناڤبەرا وان دە ل هەڤ کرن کو دەریەکی دنێ سینۆری ل سینۆرێ پارێزگەها هەولێر و ئیدارەیا سەربخوە یا سۆرانێ، کو هەڤسینۆرێ پارێزگەها ئورمیێ یە، ڤەکن.
دەریێ سینۆری دکەڤە دارستانا کێلەشینا ل دەڤەرا برادۆستا سەر ب باژارۆکێ سیدەکان ل سینۆرێ ئیدارەیا سەربخوە یا سۆرانێ، کو ڤەکرنا دەریێ سینۆری باندۆرا راستەراست ل سەر ڤەژاندنا بازارا سینۆر دکە.
رۆژا 22یێ تەباخا 2022ێ، شاندەکە کۆمارا ئیسلامی یا ئیرانێ ب سەرۆکاتیا پارێزگارێ ئورمیێ حه‌مه‌د سالح موتەمیدیان ب رێیا دەریێ سینۆرییێ حاجی ئۆمەران گهیشتە هەرێما کوردستانێ، د وێ سەردانێ دە ل گەل سەرۆکوەزیرێ هەرێما کوردستانێ مەسروور بارزانی جڤیا، هەروها هەڤدیتن و گۆتووبێژ ل گەل هەژمارەک رایەدارێن ئیدارەیا سینۆرێ پارێزگەها هەولێر و ئیدارەیا سەربخوە یا سۆرانێ ئەنجام دان، ل سەر وێ یەکێ ل هەڤ کرن کو دەریێ سینۆرییێ کێلەشین – شنۆ، ب فەرمی وەرە ڤەکرن.
دەریێ سینۆریێ کێلەشین – شنۆ، ب دووریا 76 کیلۆمەترە دکەڤە باکورێ رۆژهلاتێ ناڤەندا ئیدارەیا سەربخوە یا سۆرانێ، دەما وەرە ڤەکرن، پشتی دەریێ ناڤدەولەتیێ هاجی ئۆمەران دبە دویەمین دەریێ ناڤبەرا هەرێما کوردستانێ و ئیرانێ ل سینۆرێ ئیدارەیا سەربخوە یا سۆرانێ.
