جوانەکێ عەفرینی یێ 19 سالی پشتی کو ھەیاما 20 رۆژان ژ ئالیێ ئیستخباراتا لەشکەری یا سەر ب رێڤەبەریا خوەسەر ڤە ل حەلەبێ ھاتبوو بنچاڤکرن، دوھی مری رادەستی مالباتا وی ھاتە کرن.
رێخستنا مافێن مرۆڤان ل عەفرینێ بەلاڤ کر، بەری 20 رۆژان گەنجێ 19 سالی یێ ب ناڤێ «دیار خەلیل عۆمەر» ل تاخێ شێخ مەقسوود یێ حەلەبێ ژ ئالیێ نڤیسگەھا ئاسایشا نەتەوی یا سەر ب رێڤەبەریا خوەسەر ڤە ھاتبوو برن، دوھی دەزگەھا ئیستخباراتا لەشکەری یا سەر ب رێڤەبەریا خوەسەر ڤە مالباتا وی ئاگاھدار کر کو کورێ وان جانێ خوە ژ دەست دایە و تەرمێ وی ژی رادەستی مالباتێ کر.
ل گۆر رێخستنا مافێن مرۆڤان، پشتی کو مالباتێ تەرمێ دیار بریە پزیشکیا داد یا حەلەبێ، خویا بوو کو ئەو د بن لێدان و ئەشکەنجەیا ھۆڤانە دا ھاتیە کوشتن.
رێخستنا مافێن مرۆڤان دا زانین، دیار خەلیل عۆمەر ژ گوندێ «باسووتێ» یێ عەفرینێ یە، ئەو کارمەندەکێ رێڤەبەریا خوەسەر بوو و تەرمێ وی ئیرۆ ل گوندێ «ئاقیبێ» یێ ناڤچەیا «شێرەوا» یا عەفرینێ ھات ڤەشارتن.
تاخێن ئەشرەفیێ و شێخ مەقسوود یێن حەلەبێ، وەک تاخێن کوردان تێن ناسین کو پرانیا نشتەجھێن وان ژ عەفرینێ نە. ئەو ھەر دو تاخ د دەستێ یەپەگێ/ھەسەدێ دا نە و رێڤەبەریا خوەسەر ژی لێ ھاتیە راگھاندن.
