ئەنستیتیویا کوردی یا واشنگتۆنێ رادگهینە، ژ سالا 2015ێ هەتا نها 110 سڤیل د ئۆپەراسیۆنێن ئاسمانی یێن ئارتێشا ترکیێ یێن ل هەرێما کوردستانێ دە هاتنە کوشتن.
ل گۆری راپۆرەکە ئەنستیتیویا کوردی یا واشنگتۆنێ، ل باژارێن وەکی دهۆک، سلێمانی، هەولێر، شنگال و کەرکووکێ د ئەنجاما ئێریشێن ئاسمانی یێن ترکیێ دە، 110 سڤیل هاتنە کوشتن و 186 سڤیل ژی بریندار بوونە.
ئەنستیتیوویێ، ئەڤ ئامار ژ هەژمارەک سازی و دەزگەهێن ناڤدەولەتی یێن مەدیایی و مافێن مرۆڤان بەرهەڤ کریە و دبێژە ژ بەر زەحمەتیێن راگهاندنا ڤان ئێریشان، دبە کو هەژمارا راستی یا سڤیلان کوشتی و برینداران زێدەتر ببە.
ئەنستیتیویا کوردی یا واشنگتۆنێ، رێخستنەکە پەروەردەهی و لێکۆلینێ یە کو ل سەر کوردان رادوەستە، ئەو ل واشنگتۆنێ د ئیلۆنا 1996ان دە ژ هێلا دکتۆر نەجمەدین کەریم ڤە هاتە دامەزراندن، مەبەستێن وێ بلندکرنا هشمەندیا پرسگرێکێن کوردی، پێشڤەبرنا مافێن مرۆڤان ل دەڤەرێن کوردی و پشتگریکرنا پێشکەفتنا جڤاکا سڤیل د ناڤ کوردان دە یە.
ژ سالا 2015ێ ڤە پشتی تێکچوونا پرۆسەیا ئاشتیێ ل باکورێ کوردستانێ، شەر و پەڤچوون د ناڤبەرا گەریلایێن په‌كه‌كێ و ئارتێشا ترکیێ دە دەست پێ کرنە، ئارتێشا ترکیێ ب هنجەتا هەبوونا بارەگه‌هێن په‌كه‌كێ، ب بەردەوامی ناڤچەیێن سینۆری یێن باشوورێ کوردستانێ تۆپباران و بۆمبەباران دکن.
