ل عەفرینێ، رێژەیا تاوان، گرتن، رەڤاندن، بۆمبەبارانکرن و کوشتنێ ژ ئالیێ گرووپێن چەکدارێن کو ترکیا پشتەڤانیا وان دکە زێدە بوونە. ل گۆر راپۆرتەکا رێخستنەکا بەلگەکرنا بنپێکرنێن مرۆڤی، ژ دەستپێکا سالا 2022یێ ڤە، 530 کەس ل عەفرینێ ھاتنە رەڤاندن.
ناڤەندا بەلگەکرنا بنپێکرنان د راپۆرتەکێ دا بەلاڤ کر، ھێزێن ترکیێ و گرووپێن چەکدارێن ئۆپۆزیسیۆنا سووریێ گوھ نادن بانگێن راوەستاندنا بنپێکرنێن مرۆڤی و رۆژانە ژ بۆ ستاندنا فدیێ خەلکێ عەفرینێ درەڤینن.
دەستنیشان دکە، ھەموو حالەتێن رەڤاندنێ، نە ل سەر بنگەھا فەرمانێن دادوەری یێن دۆزگەرێ گشتی نە کو پرانیا وان ب ئاوایەکێ نەیاسایی و کەیفی تێنە کرن. پەیوەندی ب پرانیا رەڤاندیان نایێ کرن و چارەنڤیسا وان ناین زانین.
ناڤەندا بەلگەکرنا بنپێکرنان تەکەز دکە ژی، پرانیا تۆھمەتێن کو ئاراستەیی گرتیان تێن کرن، نە ل گۆری دەلیلانن و ژ بەر سەدەمێن کینێ نە.
ناڤەندا بەلگەکرنا بنپێکرنان دیار دکە، وان ژ دەستپێکا سالا 2022یێ ڤە کارینە ناڤێن 530 رەڤاندیان بەلگە بکن، لێ ھەژمارا راستییا رەڤاندیان ژ ڤێ زێدەترە.
دا زانین ژی، تالانکرنا ب ئاوایەکی سیستەماتیک، فەرزکرنا باجان، دەستدانینا سەر مال و ملکێن خەلکێ، دزینا زەیتوونان، برینا دار و دارستانان، رەڤاندنا وەلاتیان ب ئاوایەکی کەیفی و چەوساندنا خەلکێ ل عەفرینێ، بوویە دیاردەیەکا رۆژانە.
ئارتێشا ترکیێ و گرووپێن چەکدارێن ئۆپۆزیسیۆنا سووریێ یێن ترکیا پشتەڤانیا وان دکە، ژ ئادارا 2018ێ ڤە ھەرێما عەفرینێ داگیر کرنە کو د ئەنجامێ دا زێدەتر ژ 300 ھەزار وەلاتی کۆچبەر و دەربدەر بوونە، زێدەتر ژ 300 وەلاتیێن سڤیل ھاتن کوشتن، زێدەتر ژ 700 کەسێن دن ژی بریندار بوون. ھەر وھا ل گۆر ئامارێن چالاکڤانان، ژ دەما داگیرکرنا عەفرینێ ڤە، نێزیکی 8 ھەزار کەس ھاتنە رەڤاندن.
ل گۆری ئامارێن وێ ناڤەندێ، ژ دەستپێکا ئێریشا ترکیێ ل سەر رۆژئاڤایێ کوردستانێ و باکورێ سووریێ و ھەتا نھا، 2 ھەزار و 659 کەس ھاتنە کوشتن، 6200 کەس بریندار بوونە، ھەژمارا گرتی و رەڤاندیان گھیشتیە 8 ھەزار و 530 کەسان، ژ وان 6 ھەزار و 259 کەس ھاتنە ئازادکرن، یێن مایی ژی چارەنڤیسا وان نە دیارە. ھەر وھا ھەژمارا کەسێن ل گرتیگەھان د بن ئەشکەنجەیێ دا ھاتن کوشتن ژی گھیشتیە 177 کەسان.
