پاک: ئەم ئێریشا نیژادپەرەستییا 6 و 7ێ ئیلۆنا 1955ێ روورەش دکن 

د رۆژێن 6 و 7ێ ئیلۆنا 1955ێ دا، ب ئۆرگانیزەکرنا ھێزێن تاری یێن دەولەتا ترکییایێ و ب دەستێ نژادپەرەستێن ترک ڤە، ل باژارێن ستەنبۆلێ و ئیزمیرێ، ل ھمبەری گەلێن کو نەمسلمانن (رووم، ئەرمەنی یەھوودی) قەتلیعام و ئێریشەکا نەمرۆڤانە ھاتە ل دار خستن.

د ڤان 2 رۆژان دا، نژادپەرەستێن ترک، 15 کەسێن نەمسلمان کوشتن نێزیکی 300 کەسان بریندار کرن و دەستدرێژی ل سەر سەدان ژنان کرن.

ھەروەھا د ڤان 2 رۆژان دا نژادپەرەستێن ترک 4214 خانی، 1004 دکان،73 دێر، کەنیسە، 2 کەشیشخانە، 26 دبستان، گەلەک قەبرستان، فابریقە، ھۆتێل، رەستوورانت و بار ژی د ناڤ دا، ئێریش برن سەر 5317 جیھ و واران، گەلەک دەر شەوتاندن، تالان کرن، خەراب کرن.

ھێزێن تاری و کوور یێن دەولەتا ترکییایێ ب ڤان ئێریشێن نیژادپەرسەتی، ژ ئالییەکێ ڤە خواستن گەلێن نەمسلمان، ب تایبەتی ژی گەلێ رووم ژ ترکییایێ دەرخینە، رێ ڤەکە کو ژ ترکییەیێ برەڤن، ھەرن؛ ژ ئالییەکێ ڤە ژی خواستن دەست دەینن سەر مال و ملکێن گەلێن نەمسلمان دا کو سەرمایە، بکەڤە دەستێ ترکان.

ئەم د 67ەمین سالڤەگەرا ڤان ئێریش و قەتلیعامان دا، ھەموو ھێزێن ڤەشارتی و یێن ئاشکەرەیێن کو ئەڤ ئێریش پلان کرنە و بجیھ ئانینە، روورەش دکن.

6ێ ئیلۆنا 2022یێ نڤێسینگەها چاپەمەنی و راگەھاندنێ یا پاکێ