جارەکە دن چاپەمەنیا پەکەکێ، دخوازە ب رێیا دەرەو و دەزەنفەرماسیۆنا د بن ناڤێ دژاتیکرنا پەدەکێ دە، ل دژی پێشمەرگە و ستاتویا هەرێما کوردستانێ بسەکنە، پەکەکێ وەکە کارێ خوە یێ هه‌رتمی دەست ب پارڤەکرنا دەرەو و نووچەیێن سەختە ل دژی پێشمەرگەیێن کوردستانێ کری یە.
پشتی کو شەڤا دەرباسبوویی مەفرەزەیەکە چەکدارێن پەکەکێ ل خەلیفانێ ژ ئالیێ بالافرێن ترکیێ ڤە هاتیە هەدەف گرتن، پەکەکێ تەڤ مەدیایا خوە سەفەربەرکریە و ل دژی پێشمەرگەیێن کوردستانێ و پەدەکێ نووچەیێن ساختە سەرڤیس دکن.
رۆژ نیۆز یا پەکەکێ کو ل سلێمانیێ وەشانێ دکە ب مانشەتێ «راگھاندنا شەرێ تایبەت پشتراست کر کو چەکدارێن په‌ده‌كێ ئێرشی گەریلا کرنە» نووچەیەکە سەختە سەرڤیس کریە و تێدە دبێژە: «ل خەلیفانێ جارەکه دن چەکدارێن په‌ده‌كه‌یی ل ھەرێمێ ئیستیخبارات دان بالافرا دەولەتا ترک و ئێرشی گەریلا کرن، د ئەنجاما ئێرشا ھەوایی دە 2 گەریلا شەھید بوون و 3 ژی بریندار بوون، راگھاندنا په‌ده‌كێ ژی د نووچەیێن خوە دە پشتراست کر کو ھێزێن په‌ده‌كێ ئێرشی گەریلا کرنە و گەریلایێن بریندار کەتنە دەستێ ھێزێن په‌ده‌كێ«.
ئەڤ نووچەیا ساختە یا مەدیایا پەکەکێ، نیشان ددە کو پەکەکێ خوە ژ بۆ شەرێ تایبەت یێ ل دژی هەرێما کوردستانێ و پێشمەرگە ئامادە کریە و دخوازە وەکە هەرسال ئێریشەکە رێخستی یا مەدیایی ل سەر پێشمەرگە بمەشینە و ب ڤێ یەکێ شکەستنێن خوە ڤەشێرە.
گەر مەدیایا پەکەکێ راست دبێژە، بلا نووچەیا راگهاندنا پەدەکێ کو تێدە پشتراست کریە پێشمەرگە ئێریشی گەریلا کرنە پارڤە بکە، لێ هەر کەس دزانە ئەڤ نووچەیا پەکەکێ دەرەو و تو عه‌له‌قه‌تا وێ ب راستیێ رە تونەیە.
رۆژ نیۆز یا پەکەکێ هەتا نزانە ب درستاهی چەند گەریلا هاتنە هەدەفگرتن و دبێژە: «دوھ ب شەڤ د دەردۆرا ساعه‌ت 19:30 و20:00ان دە کۆمەک گەریلا کو تێ تەخمین کرن ژ 5 کەسان پێکدھاتن و ل ھەرێما خەلیفانێ دخوەستن ژ ھەرێمەکێ دەرباسێ ھەرێمەکە دن یا گەریلا ببن، راستی ئێریشا بالافرا بێمرۆڤ یا ترک ھاتنە.
گەلۆ گەر چاڤکانیێن وە دکارن ژ وە رە ببێژن «چەکدارێن پەدەکێ یێن ل هەرێمێ ئیستیخبارات دانە بالافرا ترک»، چاوا نکارن ژ وە رە ببێژن چەند گەریلا هاتنە هەدەفگرتن کو هوون دبێژن «تێ تەخمینکرن»، چما دڤێ تشتەکی ب ڤی ئاوایی بێ تەخمینکرن و پشترە ((چاڤکانیێن)) وە یێن سەختە ئاگاهیێن ووسا بدن وە کو پەدەکێ ئیستیخبارات دانە بالافرا تركا؟ ئەڤ ژ ئالیەکێ، ژ ئالیەک دن رۆژنیۆز دبێژە: «ڤان گەریلایان دخوەست ژ هەرێمەکێ دەرباسی هەرێمەکه دن یا گەریلا ببن»، گەلۆ هەرێمێن گەریلا کیژان هەرێمن؟! گەر وەکە هوون دبێژن ئەو هەرێم هەرێمێن گەریلانە “چەکدارێن پەدەکێ” ل ور چ دکن؟ ئەڤ ب تەنێ بەسە کو مرۆڤ بزانبە پەکەکە ژ خەینی دەرەوان تو شتکەکی دن دەرحەق پەدەکێ و پێشمەرگەیێن کوردستانێ پارڤە ناکە.
د بەشەکە دن یا دەرەوا رۆژنیۆزێ دە هاتیە: «راگھاندنا په‌ده‌كێ ژی د نووچەیێن خوە دە ئێعتراف کر کو ھێزێن په‌ده‌كێ ئێرشی گەریلا کرنە!! راگھاندنا په‌ده‌كێ دبێژە: ژ ھێزێن ئەولەکاریێ (پدک) تو کەس بریندار نەبوونە، ل گۆری راگھاندنا په‌ده‌كێ 2 گەریلا شەھید بوونە و 4 ژی ب برینداری کەتنە دەستێ ھێزێن په‌ده‌كێ»!.
گەلۆ قەی ئینسان دکارە چقاس بێ شەرەف بە کو دەرەوەک ب ڤی ئاوایی بکە، د تەڤ راگهاندنا پەدەکێ دە تو نووچەیەک ب ڤی ئاوایی نەهاتیە نڤیساندن، بەلکو چاپەمەنیا پەکەکێ ئەڤ دەرەو ل سەر ناڤێ راگهاندنا پەدەکێ د چاپەمەنیا خوە دە نڤیساندیە و پارڤە کریە داکو ب ڤێ یەکێ بکارن ئالیگرێن خوە بخاپینن.
یا کو د تەڤ راگهاندنێن باشوور دە هاتیە پارڤە کرن ب تەنێ نووچەیێ ئێریشا هەوایی یا بالافرەکە بێ پیلۆته ل سەر مەفرەزەیەکە گەریلایان بوو، پرانیا راگهاندنا ژی داخویانیا دژەتەرۆرا کوردستانێ ل سەر ڤێ ئێریشێ پارڤە کریە کو تێ دە دژە تەرۆر وها دبێژە:
«ل گەلیێ بالیسانێ بالافرەکە بێمرۆڤ بارەگەھەکە په‌كه‌كێ کر ھەدەف، ل گۆر ئاگاهیێن دژەتەرۆرا کوردستانێ، ئیرۆ ساەت 20:10ێ ئێڤارێ بالافره‌كه بێمرۆڤ یا نەناس ل گەلیێ بالیسان مەفرەزەیەکە چەکدارێن په‌كه‌كێ کریە ئارمانج، ل گۆری ئاگاھیان، مەفرەزەیەکە چەکدارێن په‌كه‌كێ ژ سینۆرێ رێڤەبەریا راپەرینێ دەرباس بوونە و ل گەلیێ بالیسانێ ژ ئالیێ بالافرەکە بێمرۆڤ یا نەناس ڤە هاتنە ھەدەف گرتن، سازیێن ئەولەکاریێ دەر بارێ بوویەرێ دە لێپرسین دان دەستپێکرن».
ئەڤجا ئەم ژ تەڤ کوردان دپرسین، گەلۆ نووچەیەکە ب ڤی ئاوایی ئێعترافکرن ب ئێریشێ یە یان ژی پارڤەکرنا نووچەیەك سادە یە؟ هەر وها ئەم دپرسن یا کو پەکەکە د چاپەمەنیا خوە دە دکە، ولاتپارێزی و پارڤەکرنا نووچەیانە، یانژی بێ ئەخلاقی و ولاتفرۆشی و رەشکرنا روویێ حکوومەتا هەرێما کوردستانێ و پێشمەرگەیانه؟
