دكتۆره‌كێ دیار ب ئیشكه‌نجه‌یا هۆڤانه‌ یا هه‌سه‌دێ ژیانا خوه‌ ژ ده‌ست دا

رێڤەبەرێ تێکلیێن گشتی یێ پارتیا سووریەیا پێشەرۆژێ موسه‌نا زیاب عەبدولکەریم ل باژارێ تەبقایێ یێ رۆژئاڤایێ پارێزگەها رەقایێ د ئەنجاما ئیشکەنجەیا هۆڤانە یا ل گرتیگەهێن هه‌سه‌دێ دە ژیانا خوە ژ دەست دا.

چاڤكانیێن پێگه‌ها «داركا مازی» ل رۆژئاڤا كوردستانێ ئه‌شكه‌ره‌ كرن، هێزێن سووریه‌یا ده‌مۆكراتیك ل رۆژا 7 ته‌باخا ئیسال 2022ێ، دكتۆر موسه‌نا زیاب كو رێڤەبەرێ تێکلیێن گشتی یێ پارتیا سووریەیا پێشەرۆژێ یا نێزی په‌یه‌دێ یه‌، ده‌سته‌سه‌ر كر و پاش ده‌رباسبوونا 20 رۆژان ل ژێر ئیشكه‌نجه‌یا هه‌سه‌دێ د گرتیگه‌هێ ده‌ ژیانا خوه‌ ژ ده‌ست دا.

چاڤكانیێن داركا مازی دیار كرنه‌ كو هه‌سه‌دێ دكتۆر موسه‌نا ب هنجه‌تا هه‌بوونا تێكلیان ب هێزێن ئۆپۆزسیۆنا سووریێ ره‌ ده‌سته‌سه‌ر كربوو.

هه‌روه‌ها ده‌ستنیشان كرنه‌ كو هه‌سه‌دێ د گرتیگه‌هێ ده‌ ب گرانی دكتۆر موسه‌نا ئیشکەنجە كریه‌ و ل ژێر ئیشكه‌نجه‌یێ دە ژیانا خوه‌ ژ ده‌ست دایه‌، چەکدارێن هه‌سه‌دێ‌ پشتره‌ ل رۆژا 27/8/2022 جه‌نازه‌یێ وی راده‌ستی مالباتا وی دکن و ژێ ره‌ گۆتنه‌ كو ئه‌و ب كریزا ته‌ندروستیێ مری یه‌.

چاڤكانیێن خوه‌جیهی ژی ئه‌شكه‌ره‌ كرنه‌ كو مالباتا دكتۆر ئیدیعایێن هه‌سه‌دێ ده‌رواندنه‌ ژ به‌ر كو نیشانەیێن ئیشکەنجەکرنێ ل سەر جەسەدێ دكتۆر هاتیه‌ دیتن.

هێژایی گۆتنێیە کو بەری چەند رۆژان ژی رۆژنامەڤان «عه‌ممار ئەل-زەکاب» كو ژ باژارێ رەقایێ یه‌ د ئەنجاما ئیشكه‌نجه‌یا هۆڤانە یا چەکدارێن هەسەدێ دە د زیندانەکە هه‌سه‌دێ دا هاتە کوشتن.

هێزێن سووریه‌یا ده‌مۆكراتیك ئه‌ڤ ده‌مه‌ك درێژه‌ خەباتکارێن چاپەمەنیێ و چالاکڤانان ل رۆژئاڤا كوردستانێ و هه‌رێمێن د بن كۆنترۆلا رێڤه‌به‌ریا خوه‌سه‌ر ده‌ ب تۆمەتا تێكلیێن ل گەل ئارتێشا نیشتمانی و ئیستخباراتا ترکیێ ده‌سته‌سه‌ر دكه‌ و ئیشكه‌نجه‌یێ ل وان دكه‌، دكتۆر موسه‌نا قوربانیێ هه‌ری داوی یێ ڤێ كامپانیایا هه‌سه‌دێ یه‌.