ئاسایشا رێڤەبەریا خوەسەر راگهاند، دوهـ ب شەڤ د دەما برێڤەچوونا ئۆپەراسیۆنێ دە ل ناڤ کامپا هۆلێ، شانەیێن داعشێ ئێریشی هێزێن وان کرنە و د ئەنجاما شەر و پەڤچوونان دە چەکدارەکی داعشێ کو جلێن ژنان ل خوە کربوو و هەول دابوو برەڤە، هاتیە کوشتن و 6 چەکدارێن دن هاتنە گرتن.
ئۆپەراسیۆنا پێنگاڤا مرۆڤی و ئەولەهیێ یا ل کامپا هۆلێ کو ژ ئالیێ هێزێن ئاسایشا رێڤەبەریا خوەسەر و هه‌سه‌دێ ڤو دەست پێ کریە، د رۆژا خوە یا 15ێ دە بەردەوامە و هەتا نها ب دەهان ئەندام و چەکدارێن شانەیێن نهێنی یێن داعشێ هاتنە گرتن، چەندین تونەل هاتنە دیتن و ب دەهان کۆن ژی هاتنە راکرن کو داعشێ ژ بۆ کارووبارێن خوە، جەزاکرنا خەلکێ بکار دئانین.
ئاسایشا رێڤەبەریا خوەسەر، ئیرۆ داخویانیەک بەلاڤ کریە و راگهاندیە، دوهـ ب شەڤ ل ناڤ کامپا هۆلێ د ناڤبەرا هێزێن ئۆپەراسیۆنێ و چەکدارێن شانەیێن نهێنی یێن داعشێ دە شەر دەرکەتیە.
دیار کریە، شانەیێن داعشێ ئێریشی هێزێن بەشدار د ئۆپەراسیۆنێ دە کرنە و شەر دەرکەتیە و د ئەنجاما شەر دە «ئەندامەکی شانەیێن داعشێ هاتیە کوشتن، هەروها 6 ئەندامێن داعشێ هاتن گرتن کو 2 ژێ ژن بوون».
