د ئەنجاما تەقینا مینەکێ دە 4 زارۆکێن كورد بوون قوربانی

ل گوندەکی سەر ب کۆبانێ ڤە د ئەنجاما تەقینا مینەکێ ژ پاشمایێن شەر دە، زارۆکەک هات کوشتن و 3 زارۆکێن دن بریندار بوون.

رەوانگەها سووری یا مافێن مرۆڤان راگهاند، ل گوندێ ئیداق یێ کۆبانێ، د ئەنجاما تەقینا مینەکێ ژ پاشمایێن شەر دە، زارۆکەک هات کوشتن و 3 زارۆکێن دن بریندار بوون.

ل گۆری ئامارێن رەوانگەهێ، ژ دەستپێکا سالا 2022ێ دە، 185 کەس ل سەرانسەری سووریێ ب مین، بۆمبە و پاشمایێن شەر هاتنە کوشتن و 258 ژی بریندار بوونە.

د ڤێ دەربارێ دە نەتەوێن یەکگرتی دبێژە، سووریە یەک ژ وەلاتێن کو هەری زێدە وەلاتی دبن قوربانیێن مین و بۆمبەیان کو د ناڤبەرا سالێن 2016 – 2021ێ دە، هەر 10 خولەکان بوویەرا تەقینا مینەکێ روو دابوو.

ل گۆری رێخستنا خاجا سۆرا ناڤدەولەتی، ژ سالا 2011ێ و هەیا نها، 12 هەزار کەس بوونە قوربانیێن مین و بۆمبەیان کو 35% ژ وان هاتنە کوشتن و 50% ژ وان بوونە خوەدی پێویستیێن تایبەت.

د راپۆرتێن رێخستنێن ناڤدەولەتی دە کو بەریا نها بەلاڤ بوونە هاتیە ئەشکەرە کرن، ژ بەر مین و پاشمایێن شەر، ژیانا 10 ملیۆن کەسی ل هوندرێ سووریێ و ب تایبەتی ل پارێزگەهێن رەققا و حەلەبێ د مەترسیێ دە یە.