مالباتەک داخوازا دیارکرنا چارەنڤیسا کورێ خوە ژ په‌یه‌دێ دکە

Ehmed Osman Sîdo - pyd-pkk-halab-rojava-efrin (1)

مالباتا کورد یا عه‌فرینێ کو کوڕێ وان بەری 9 سالان ل حەلەبێ هاتیە رەڤاندن، داخوازا دیارکرنا چارەنڤیسا وی ژ په‌یه‌دێ دکە و بانگ ل رێخستنێن مرۆڤی، یاسایی و جڤاکا ناڤدەولەتی دکە، فشارێ ل په‌یه‌دێ بکن، تا کو چارەنڤیسا کوڕێ وان دیار بکە و سەربەست بەردە.

مالباتا ئەحمەد ئۆسمان سیدۆ ئیرۆ د داخویانەکێ دە راگهاند، «گرووپەکە سەر ب په‌یه‌دێ ژ رۆژا 10/9/2013ێ ڤە ئەحمەد ئۆسمان سیدۆ ل تاخا شێخ مەقسوود یا حەلەبێ رەڤاند و هەتا نها چارەنڤیسا وی نەدیارە».

د داخویانیێ دە هات گۆتن: «گەلەک جاران مە پرسا ئەحمەد ژ په‌یه‌دێ کر، لێ ئەو رەد دکە کو ئەحمەد رەڤاندبە یان ژی د زیندانێن وان دە بە، ژ بەر ڤێ یەکێ ئەم داخوازێ ژ په‌یه‌دێ دکن چارەنڤیسا برایێ مە ئاشکەرە بکە، ژ بەر کو بەرپرسیاریا ژیانا وی ل سەر ملێ وێ یە».

مالباتا ئەحمەد ئۆسمان سیدۆ بانگ ل رێخستنێن مرۆڤی، یاسایی و جڤاکا ناڤدەولەتی کر، فشارێ ل په‌یه‌دێ بکن تا کو چارەنڤیسا برایێ وان دیار بکە و سەربەست بەردە.

ئەحمەد ئۆسمان سیدۆ سالا 1960ی ل گوندێ حوسێ یێ ناڤچەیا مابەتا یا عه‌فرینێ ژ دایک بوویە و ل تاخا شێخ مەقسوود یا باژارێ حەلەبێ روونشتبوو.

تاخا شێخ مەقسوود ل حەلەبێ، وەک تاخا کوردان تێ ناسین کو پرانیا نشتەجهێن وێ ژ عه‌فرینێ نە، تاخا شێخ مەقسوود و تاخا ئەشرەفیێ دۆرا 200 هەزار کوردان لێ دمینن، ژ سالێن دەستپێکێ یێن کریزا سووریێ ڤە د دەستێ یه‌په‌گێ دە یە و رێڤەبەریا خوەسەر ژی لێ هاتیە راگهاندن.

پوستێن ھەمان بەش