ژ بەر پەیڤا “کوردستان” دەربارێ سیاسەتمەدارێ جەهەپێ دا لێپرسین ھات دەستپێکرن

سەردۆزگەریا کۆماری یا دیاربەکرێ، دەربارێ ئەندامێ ئەنجوومەنا جەهەپێ «نەواف بیلەک» دا ب بەهانەیا “بانگەشەیا رێخستنا تەرۆری” لێپرسین دا دەستپێکرن.

نەواف بیلەک 12 سالان سەرۆکێ رێخستنا سێرتێ یێ جەهەپێ بوو و نھا ژی ئەندامێ ئەنجوومەنا پارتیێ یا جەهەپێ یە. ل گۆری راگھاندنا سەردۆزگەریێ نەواف بیلەک، د کۆنگرەیا رێخستنا جەهەپێ یا دیاربەکرێ دەا د گۆتارەکا خوە دا دبێژە؛ “ب راستی ژی دیاربەکر ژ بۆ کوردستانا ترکیایێ باژارەکی دیرۆکی و گرینگە.”

گۆتنێن نەواف بیلەک ژ ئالیێ ھن بکارھێنەرێن مەدیایا جڤاکی و مەدیایا نێزیکی دەستھلاتداریێ ھاتن بەلاڤکرن و بەرتەک نیشانی وی ھاتن دایین.

ژ ئالیێ دن ڤە ل باژارێ سێرتێ د جۆتمەھا 2021ێ دا د دەما سەردانا سەرۆکا گشتی یا IYI پارتیێ دا وەلاتیەکی ب ناڤێ «جەمیل تاشکەسەن» گۆتبوو کو “ئەڤ دەر کوردستانە” ھاتبوو بنچاڤکرن و دووڤ را سەربەست ھاتبوو بەردان.

بەرێ ئەردۆگان ژی گۆتبوو ئەڤ دەر کوردستانە

ھەر دیسا سەرۆک کۆمارێ ترکیایێ رەجەب تەییب ئەردۆگان د 2013ێ دا دەما کو سەرۆکوەزیر بوو د کۆمجڤینەکا پارتیا خوە دا گۆتبوو؛ “پێویست ناکە ئەم گەلەک دوور بچن، بەرێ خوە بدن ژ بەریا 90- 100 سالان، بلا رێڤەبەرێن مەھەپێ و جەهەپێ ل گرتەنامەیێن پارلەمەنتۆیێ بنێرن، بلا ل گرتینامەیێن جڤینێن ڤەشارتی بنێرن، د وان تشتێن کو ل دژی دەردکەڤن دێ ببینن. دێ پەیڤا کورد د وان گرتینامەیان دا ببینن، دێ پەیڤا کوردستانێ د وان گرتینامەیان دا ببینن. دەما کو ل دیرۆکا عۆسمانیان بنێرن دێ ببینن کو ناڤێ رۆژھلات و باشوور رۆژھلاتێ ترکیایێ پارێزگەھا کوردستانێ یە.”

پوستێن ھەمان بەش