رێخستنەکا مافێن مرۆڤان رادگھینە، ل 5 کامپێن کۆچبەرێن عەفرینێ یێن ل باکورێ حەلەبێ، زێدەتر ژ ھەزار کەسان ب نەخوەشیا کۆلێرایێ کەتنە کو ژ وان 443 زارۆکن.
رێخستنا مافێن مرۆڤان یا عەفرین – سووریێ د داخویانیەکێ دا دیار کر، رەوشا تەندورستیێ د ناڤا ب ھەزاران کۆچبەرێن عەفرینێ یێن کو ل 5 کامپ و گوندێن گوندەوارێن ھەرێما شەھبا ل گوندەوارێ باکورێ حەلەبێ دژین گەلەک خراپە و دەرمان ژی ل نەخوەشخانەیا ب تەنێ یا ھەرێمێ و خالێن تەندروستیێ کێمن.
وێ رێخستنێ دەستنیشان کر: ب بەردەوامیا دۆرپێچکرنا ھێزێن رێژیما سووریێ و بۆمبەبارانا رۆژانە ژ ئالیێ ھێزێن ترکیێ ڤە ل سەر ھەرێمێ و ب بلندبوونا پلەیا گەرمێ، رێژەیا تووشبوونێن ب نەخوەشیێن ڤەگوھێز و نەخوەشیێن ئیلتیھابا رۆڤکان و کۆلەرایێ زێدە دبە.
دیار کر ژی، ژ رۆژا 20ێ تەباخا بۆری ڤە، 1009 حالەتێن پێکەتنا ب کۆلەرایێ ل نەخوەشخانەیا ئاڤرینێ ھاتنە تۆمارکرن کو ژ وان 443 زارۆکن.
پشتی داگیرکرنا عەفرینێ ژ ئالیێ ئارتێشا ترکیێ و گرۆپێن چەکدارێن سەر ب وێ ڤە د ئادارا 2018ێ دا، نێزیکی 125 ھەزار کۆچبەرێن عەفرینێ ل 5 کامپێن ھەرێما شەھبایێ (باکورێ حەلەبێ)، تل رەفعەت و گوندێن وێ ب جھ بوونە و ژ بەر دۆرپێچا ھێزێن رێژیما سووریێ یا ل سەر وێ ھەرێمێ و نەبوونا رۆلا و ئالیکاریێن رێخستنێن مرۆڤی، رەوشا تەندروستیێ خراپە و گەلەک کێمانی د دەرمانان دا ھەیە.
رێخستنا مافێن مرۆڤان یا عەفرین – سووریا بانگ ل ئالیێن پێوەندیدار، رێخستنێن مرۆڤی و ناڤدەولەتی و ب تایبەتی رێخستنا تەندورستیا جیھانێ، یۆنیسەف و خاچا سۆرا سووری دکە، ب ئەرکێ خوەیێ ئەخلاقی رابن و ئالیکاریێن پێویست پێشکێشی ھەرێمێ و کۆچبەرێن عەفرینێ بکن.
