جەنگیز تورکانێ ژ «ئیدرێ» ل گوندێ «ئارپادەرە»یێ ناڤچەیا «ئینجیرلۆڤا»یا ئایدنێ خانیەک کری. جەنگیز تورکانێ کو ژ بۆ دیتنا مالا کو کری لگەل مالباتا خوە چووینە گوندێ ئارپادەرەیێ، دەستپێکێ ژ ئالیێ گوندیان ڤە راستی گەفان ھات و پشترا ژی راستی ئێریشێ ھات.
ل گۆر نووچەیا ئاژانسا «Bianet»؛ د ئێریشا کو ب دار، ئاسن و چەکان ھات کرن دا ژن و زارۆک ژی د ناڤ دا 4 کەس ب توندی ھاتن دەربکرن. ژ مالباتا کو راستی ئێرشێ ھاتیە «سەمیرا تورکان» ل سەر بەرنامەیا پشتگریا ژنان (کادەس) ژ پۆلیس و جەندرمەیان ئالیکاری خواستیە لێ چ تیمێن ئالکاریێ نەھاتنە جھێ ئێرشێ.
مالباتێن کو ئێریش ل وان ھات کرن سەرپێھاتیێن خوە ژ بۆ ئاژانسا مەزۆپۆتامیایێ ڤەگۆتن.
“ئەڤە رۆژھلاتی نە، نکارن بهێنە د گوندی دا”
ئیمرا چاکمازێ کو ژ سەرێ خوە و گەلەک جھێن لاشێ خوە ب گرانی بریندار بوویە دەربارێ ئێریشێ دا وھا گۆت: “بەری نھا ل ئیزمیرێ روودنشتم. ئەڤە 2 سالن ل ناڤچەیا «ئەفەلەرێ» دژیم. د بیناسازیێ دا کار دکەم. زاڤایێ مە جەنگیز تورکان ژ گوندێ ئارپادەرەیا ناڤچەیا ئینجیرلیۆڤایێ خانیەک کری. مە خانی ژ پۆلیسەکی خانەنشینبوویی کری و لگەل پۆلیسی ئەم چووین کو خانی ببینن. دەما کو گوندیان ئەم دیتین برایێ من گازی کرن و ل قەھوەخانەیا گوندی ژێ رە گۆتن کو ‘ھوون چما ھاتن ڤر’. ژ بۆ کو مالێ ببینن ئەم ژی چووین پێش خانی. خانی 2 قاتی بوو و تاپوویا وێ ژی یا مووشتەرەک بوو. مە قاتا یەکەم کری. برایێ خوەدیێ ل قاتا ژۆر دژیا ل قاتا یەکەم د کرێ دا روودنشت. برایێ خوەدیێ مالێ گۆتە پۆلیسێ خانەنشینبوویی، ‘چما تە ئەڤ خانی فرۆت، تو خانی بفرۆشی ڤانا ئەڤ نکارن بهێنە ناڤا گوندی’. پۆلیسی ژی گۆتە وان، ‘کا جارێ دەری ڤەکن بلا خوەدیێ نوو خانی ببینە.’ دەما پۆلیس وسا گۆت خوەدیێ دی یێ خانی ب دەستێ خوە ئیشارەتا چەکێ کر و دا بەر ئەنیا پۆلیسی.”
“وان رێیا مە گرتن”
چاکماز، ئانی زمان کو پشتی ئەو ژ مالێ دەرکەتن، ئەو چوونە قەھوەخانەیا گوندی و ئانی زمان کو ل ڤر ژی ژ ئالیێ گوندیان ڤە گەف ل وان ھاتنە کرن. چاکماز ئانی زمان کو دەما بەر ب ئەفەلەرێ ڤە چووین گوندیان رێیا وان گرت و وھا گۆت: “ب دار و ئاسنان ھاتن. ھێژ کو تشتەک نەگۆتین یەکی ب ئاسنی ل دەستێ من دا، یەکی دن ب داران ل سەرێ من دا. دەما کو من سەرێ خوە راکری من دیت کو ل برایێ من ددەن. پشت را تراکتۆرەک دن ژ پشت مە ڤە ھات و تێ دا ژن و مێر ھەبوون. ژنەکێ ئێرشی من کر، کراسێ من دراند و گۆت، ‘ڤان نەشینن جھەکێ، بلا ل ڤر بن، گوندی د رێ دانە و یێن دهێن.’ من گۆت کو ‘خوین ژ من دچیت، ئەز دێ مرم.’ گوندیا ئەڤ یەک پشتگوھ کرن. یەکێ کەڤرەک ئاڤێتە من، کەڤر ل ستویێ من کەت.’
“وان هزر کر کو ئەو مرییە و رەڤیانە”
چاکماز، ئانی زمان کو تەلەفۆنا زاڤایێ خوە جەنگیز تورکان کریە و ئالیکاری ژێ خواستیە و وھا گۆت: “جەنگیز ژ بۆ کو من بگەھینە نەخوەشخانەیێ ئەز رەڤاندم. دەما کو ئەم ب ترومبێلێ دچووینە نەخوەشخانەیێ من دیت کو گەلەک گوندی ب تروەمبێلێن خوە دھاتن. د وێ کێلیێ دا من تەلەفۆنا جەندرمەیان کر و من ئالیکاری خواست. جەندرمە گۆتە من ‘ھەرە نەخوەشخانەیێ راپۆرتا لیدانێ وەرگرە پاشان ژی سکالایێ ل دژی ھەموویان تۆمار بکە و تەلەفۆن ل سەر من گرت. دەما کو ئەم گھشتین نەخوەشخانەیێ بابێ من تەلەفۆنا من کر و من ب ڤی رەنگی بەرسڤا وی دا: ‘رەوشا مە ھەموویان نەباشە. رەوشا برایێ من حەسەن نەباشە، سەرێ وی شکاند. گولە بەردان پیێ دایکا من. ژ بۆ کو خوە خەلاس بکم ئەز بەر ب دارستانێ ڤە رەڤیام. دبیت کو دایک و برایێ من مربن ژی.’ دەما کو مالباتا من ل جھێ بوویەرێ ژ سەر ھشێ خوە ڤە دچن گوندی دبێژن قەی مرنە و ژ ور درەڤن دچن.”
