وەزارەتا ناڤخوە یا ترکیێ د داخویانیەکێ دە راگهاند، کو هێزێن لەشکەری یێن وی وەلاتی ل سینۆرێ پارێزگەها جۆلەمێرگێ یا باکورێ کوردستانێ ئۆپەراسیۆنەکە نوو ل دژی پهكهكێ دانە دەستپێکرن.
ئۆپەراسیۆنێن ئارتێشا ترکیێ ل ناڤچە و پارێزگەهێن جودایێن باکورێ کوردستانێ بەردەوامن. ل سینۆرێ پارێزگەها جۆلەمێرگێ، لەشکەرێن ترکیێ ئیرۆ پێنجشەمبێ 15ێ ئیلۆنا 2022 دەست ب ئۆپەراسیۆنەکە نوو ب ناڤێ «ئەرەن دۆرپێچ-37» کرن.
وەزارەتا ناڤخوە یا ترکیێ ب داخویانیەکێ دەستپێکرنا ئۆپەراسیۆنا نوو ئاشکەرە کر و دیار کر کو ئۆپەراسیۆن ل ناڤچەیا چەلێ یا جۆلەمێرگێ تێ کرن.
ل گۆر داخویانیێ، ئۆپەراسیۆنا ل چەلێ یا ل دژی پهكهكێ ب بەشداربوونا 610 لەشکەرێن سەر ب فەرمانداریا جەندرمە و جەردهڤانان کو ژ 38 تیمان پێک تێ، دەستپێ کریە.
د رۆژا ئەولا ئۆپەراسیۆنێ دە هات دیارکرن کو لەشکەران ل دەشتا خانێ دەپۆیەکە چەک و جەبلخانە یا پهكهكێ دیتنە و دەست ب سەر دە گرتنە.
تێکلداری ئۆپەراسیۆنا ل چەلێ و دەستبسەردەگرتنا دەپۆیەکە چەک و جەبلخانەیێ دە، پهكهكێ هێژ ت داخویانی نەدایە.
زێدەیی سالەکێیە کو هێزێن ترکیێ ب ناڤێ ئۆپەراسیۆنێن «ئەرەن» ل ناڤچەیێن جودا یێن پارێزگەهێن ئامەد، مێردین، دێرسم، شرنەخ، جۆلەمێرگ، ئاگری، بەدلیس، ئیدر، قەرس، ئەردەخان و چەند ناڤچەیێن دن یێن باکورێ کوردستانێ ئۆپەراسیۆنێن نوو ل دژی پهكهكێ دەستپێ کرنە.